Mizo Taxi mobile application hmang turin lirthei 1,260 an inziaklut tawh
Transport Department thawktute sawi danin, Mizo Taxi mobile application hmang tur hian July ni 24, 2026 thleng khan Two Wheeler taxi 889, Four Wheeler Taxi 352 leh Auto Rickshaw 19 an inziaklut tawh a, document fello vanga hnawl (reject) lirthei 135 a awm bawk.
Hetianga inziaklut an awm mek lai hian ATTA hruaitute chuan Mizo Taxi mobile application chu lirthei a eizawng pawl pathum ten an dodal chhunzawm zel tih an sawi a. Mizo Taxi Application chu High Court a khin tumin hmalakna an kalpui chhunzawm zel a, tunah hian document pawimawh RTI hmangin an dil mek a, chumi chhanna an hmuh hunah High Court luh theih tawh an inrin thu an sawi a ni. Pawl pathum ten Mizo Taxi application an hman duh loh chhan hrang hrang zingah rate ennawn hmasak an duh thu te, registration fee awm lo se tih te leh app hmangtu mipuiten chhiah za a 6 an chawi tur te a tel tih an sawi a ni,
Aizawl khawpui chhungah hian 'Mizotaxi' app hi July ni 1, 2026 atang khan hman tan a ni tawh a. A tira dilna hun hawn hun chhung chu tawp tawh mah se July ni 31, 2026 thleng inziahluih hun hawn belh leh a ni a. Transport Deaprtment thawktute chuan Mizo Taxi a inziahluh tum an awm ve reng thu an sawi a. Sawrkar duhdan angin Mizo Taxi online application hi Aizawl khawpui chhungah bul tan phawt a ni anga, a tahtawlin District dangah pawh kalpui chhoh zel tum a ni.
Mizo Taxi hnuaia in register te tana registration fee lo chhuah tawh chu thuneitute remtihna in motor pakhat ah Rs. 500/- ah siam rem a ni a. He Registration fee hi a motor service hun chhung atan a ni anga, a bak pek leh a ngai tawh lo ang. State Transport Authority (STA) chuan thuchhuah siamin Mizo Taxi-ah huntiam chhunga mipui mamawh khawp lirthei in-register an awm loh chuan a tul angin Mizo Taxi hnuaia tlan tur permit pek belh a nih tur thu a tarlang tawh a ni.