Mizo Carbon Product subsidy thubuai-ah mi pali thiamloh chantirin mi 13 in thiam an chang

Mizo Carbon Product subsidy eiruk thubuai-a inhnamhnawih ah puh mi pali te chu Court chuan thiamloh chantirin midang 13 te erawh thiam a chantir thung.

Special Court, Prevention of Corruption Act Judge, F. Rohlupuia chuan Mizo Carbon Product subsidy eiruk thubuai ah nimin khan mi pali te chu Section 120b, 420 leh 471 IPC hnuaiah thiam loh a chantir a, Special Judge F. Rohlupuia chuan Ravi Gulgulia, Vimal Kishore, Pramod Bharech leh Sandeep Agarwal te chu thiam loh chantirin, prosecution-te chuan an chunga puhna te chu rinhlelhna tur engmah awm lo khawpin an finfiah thu a sawi a. Amerawhchu, Court chuan accused dangte an puhna erawh chu rinhlelhna tur awm lo khawpa prosecution ten finfiahna an pek zawh loh avangin thiam a chantir thung a ni.

He thubuai hi kum 2017 atangin a kal tawh a. Industrial Growth Centre, Luangmual-a Mizo Carbon Product Ltd. te chuan sawrkar laipui in hmarchhak biala thil siamchhuahna tih hmasawnna atana a ruahman, Central Transport Subsidy(CTS) leh Central Capital Investment Subsidy (CCIS) a pek te chu dik lo takin an dil nia sawi a ni a. CTS leh CCIS hnuaiah hian cheng vbc. 3.41 vel an la tawh nia sawi a ni a. CTS leh CCIS hnuaia subsidy dawng tur hian coke siamchhuahna tura hmanrua te, phurh kualna leh lehkha dangte chu lehkha lem hmanga lak vek niin a sawi tih kan thulakna (www.jclalnunsanga.in)-ah tarlan a ni.