MIGAHTA ten nawrh titawpin sawrkar hmalakna ngaihchan zui an tum

Mizoram Govt. Adhoc Aided High School Teachers Association (MIGAHTA) chuan sawrkar laka an thilphut nawr nana lungawi lohna an lantir chu nimin khan an titawp ta.

MIGAHTA hian Provincialised an nih tawh ang ngeia Provincialised dinhmun a dah let leh tuna an dinhmun, Adhoc-Grant-in-aid atanga dinhmun hniam zawk. Lumpsum-Grant-in-aid a sawrkar in dah a tum duh lovin tun thla ni 21 atang khan Badge dum belin lungawi lohna an lantir tan a, nimin thleng khan lungawi lohna an lantir hnuah nimin chhun dar 12:00 khan lungawi lohna an lantir hi an titawp ta a. MIGAHTA chuan an lungawi lohna lantir chungchang ah hian niminpiah khan MZP Palaina hnuaiah sawrkar aiawh Adviser to CM Lalmuanpuia Punte chu kawmin an lungawi lohna leh an thilphut te an thlen tih an sawi a. Adviser to CM hian sawrkar lam atanga an ruahmanna neih leh hma a lakpuina turte a lo hrilh a, boruak tha tak hnuaiah inbiakna an neih avang hian an lungawi lohna lantir mek chu titawpin August 3, 2026 atangin an hna te an zawm tur thu an tarlang bawk a ni.

MIGAHTA chuan Resolution pali (4) pass in heng zingah hian sawrkar nen an inbiakna ah an lungawi lohna leh thilphut te chu tun thla ni 12-a ZPM PAC Meeting-a an sawiho tur thu leh chu an thutlukna chu concerned department-ah thlen an tiam ang ngeiin PAC Meeting thutlukna leh Department hmalakna an ngaichang reng dawn tih an sawi a. MIGAHTA leh sawrkar aiawhte inbiak leh hmaa The Mizoram Education (Lumpsum Grantsin-Aid for General Maintenance of Private School) Rules, 2026' tihchhuah thar chu Adhoc High School, Provincialised ve lo te Special Category-I a dah an nihna notification chhuah lo tura an ngenna chu bawhzui an tiam anga sawrkarin notification a tihchhuah loh an beisei thu an sawi bawk.

Hei bakah hian MIGAHTA chuan tuna an dinhmun aia hniama sawrkarin dah a tumna 'The Mizoram Education (Lumpsum Grants-in-Aid for General Maintenance of Private School) Rules, 2026' chu an pawm thei ngai dawn lo tih pawh sawiin, High School tan Special Category-I notification tichhuak lo turin thuneitute chu an ngen thu an sawi bawk a, an thilphut te chu tih hlawhtlin sak ngei tura sawrkar an ngen thu an sawi bawk a ni.