Lungawi taka awmho theih nan kan sira mite mitmei veng reng chunga kal kan zir a ngai - Chief Minister
Inrinni khan Aizawl Falkland-a LPS Arena-ah Joint Hnampual Students’ Organisation (JHSO) bultumin ‘Joint Hnampual Meet-2026’ neih a ni a, he hun hi Chief Minister Lalduhoma chuan khuallian nia hmanpuiin Mizoram-a Hnampual zirlai pawl pasarih ten unau kan nihzia hriaa Joint Students’ Organisation an din chu lawmawm a tih thu sawiin, Inpawhna tha zawk a awm theihna tura intawhkhawmna (Meet) buatsaih a ni chu lawmawm a tih thu leh Meet thupui, ‘Zofate kan ni, inen hrang thei kan ni lo’ tih chu a taka nunpui a pawimawh thu a sawi a ni. Chief Minister chuan Sawrkarin Minority-te a ngaihsak thu pawh sawiin, Minority-te sawmna chu a ngaih pawimawh thu leh a rem chuan a tel zel thu a sawi bawk.
Chief Minister chuan Mizoram chhunga chengte inngeih taka kan chen theihna chhan pawimawh tak chu Hel pawl awmlohna State kan nih vang a nih thu sawiin, “Mizoram hi State ralmuang taka chantir ngei tumin Mizoram sawrkar chuan theihtawp a chhuah a, sawrkar hmalaknate a kal tluang a, kumin April ni 30 khan Hnampual helpawl awmchhun HPC (D), Lalhmingthanga Sanate Faction-te chuan ralthuamte tungin, Mizoram-ah hnampual hel pawl awm tawh lovin, remna leh muanna chu a tak ramin a lo thleng ta,” a ti a. Hel pawl awm lohna state kan nihna chu chhawm nung zel turin kalkhawmte chu a fuih a. Zofate inpumkhata awm a pawimawh thu pawh Chief Minister chuan sawiin, mahni hnampual zia te, Culture te, tawng te chhawmnung zel chungin inlungrual taka indaidanna leh inlakhranna awm lova chenho zir a tul thu a sawi a, Hnam inpumkhatna turin tawng thuhmun hman tlan a pawimawhzia sawiin, Mizoram-ah hnampual tin ten mahni tawng theuh humhalh chungin inpawh taka kan awmna turin tawng thuhmun (Common Language) hman theih a tul thu a sawi a. Mizo tawng tihhausak zelna kawngah pawh Hindi te, Sap tawng te lachhawng lovin, Mizo hnampualte tawng leh thumal zawk sengluh chhin a pawimawh tiin a sawi bawk a. Hnam sulhnu (history) te chu ngai pawimawh a, a theih ang zela ngaihven leh zir tura chah bawkin, Mizoram hnampualten mahni hnam History mai bakah thu leh hla (literature)-te ngaihven thar a, internet lamah dah chhuak tam tur leh Sap tawnga letlinga phochhuah uar zel turin a fuih bawk a ni.
State pakhatah emaw, Bial pakhata Majority emaw Minority nih hi thiam a pawimawh thu pawh Chief Minister chuan sawiin, lungawi taka awmho theih nan kan sira mite mitmei veng reng chunga kal kan zir a ngaih thu a sawi a, Zofate hi nimin-a mite chherchhuah an ni a, naktuk-a Zofa lo awm leh turte hi Vawiin-a mite chherchhuah tur an nih thu sawiin, Vawiin-a ram leh hnam enkawl mektute hian Naktuk atan thangthar tha zawk kan chherchhuah a ngai tih hre rengin hmalam pana ke penin, hma kan sawn zel a pawimawh tih a sawi bawk.
Joint Hnampual Meet buatsaihtu JHSO hi Hnampual zirlai pawl hrang hrang- Mizoram Bawm Students Union, Ranglong Student Union, Hmar Student Association, Pang Zirlai Pawl, Siamsinpawlpi, Lai Student Association leh Mara Student Organisation inzawmkhawm niin nileng in hun an hmang a ni.
Joint Hnampual Meet-2026 hi Adviser to Chief Minister (Political) Lalmuanpuia Punte pawhin khual zahawm nia hmanpuiin JHSO Senior Vice Chairman, Jairas Ranglong chuan a kaihruai a, Central YMA Vice President Prof. Lalnuntluanga pawhin he hun hi Uaptu nia a hmanpui bakah JHSO Chairman Stephan Rutland pawhin thu a sawi a, Report ngaihthlak a ni bawk.