Lamsial Puk-a ruhro kum zat chhut a ni
Mizo Archaeological Society (MAS) chuan Lamsial Puk-a ruhro hlui awmkhawm te chu Radiocarbon (Carbon-14) dating hmanga a kum chhut tura an thawnchhuah result chu an dawng tawh a, uluk taka zirchian a nih hnuah kum AD 1729 atanga 1789 inkara mi a ni tih chhutchhuah a ni a, Ruhro tam tak awm mah se, zirchian bik hi ruhro pakhat chauh a nih avangin kum AD 1729 atanga 1789 inkara mi vek an ni tihna a ni lo tih an sawi a ni.
MAS hian Lamsial Puk-a mihring ruhro sample pakhat chu lain Florida, Miami-a inbun Beta Analytics hnenah Carbon-14 dating hmanga a kum chhut turin an thawn a. MAS hian Carbon-14 dating tihna tur sum senso hi kum 2023 khan Art & Culture Department atangin Rs. 1,50,000 an dawng a ni. Mizo Archaeological Society member-te hi Mizo pi leh pute chanchin mumal taka zirchian tum, zirna leh thiamna kawng hrang hrang nei an ni a, tunhnaia Mizoram chhunga ruhro leh hmanlai thil hailan leh laihchhuah hrang hrangte lakhawmin an zirchiang thin a ni.