IPRP&S Minister-in Media te chu thu dik tak chauh pechhuak thin turin a fuih

Information & Public Relations and Printing & Stationery (IPRP&S) Department changtu Minister B. Lalchhanzova chuan tunlaiah thuthang dik lo a darh chak em avangin Media te chu thu dik tak chauh pechhuak thin turin a fuih.

Nimin khan Aizawl-a I&PR Conference Hall, Lianchhiari Run-ah Press Information Bureau (PIB), Ministry of Information & Broadcasting, Government of India buatsaiha Inter-Media Publicity Coordination Commitee (IMPCC) Meeting neih a hmanpuina ah IPRP&S Minister B. Lalchhanzova chuan tunlaiah information a darh chak tawh em avangin information dik lo laka inven nan thawhona mumal tak neih a pawimawh thu sawiin, IMPCC chu sawrkar laipui leh State sawrkar te nena thawkhoin, mipuite hnena thu dik tak pekchhuah kawngah an pawimawh thu a sawi a. Media te chu sawrkar policy leh scheme hrang hrang Mizo tawnga lehlin te, an platform-ah tilang tam turin leh information chu mi zawng zawng huapzo a ni tur tih a sawi a. Tunlaiah thuthang dik lo a darh chak em avangin media te chu an thuchhuah reng reng an website leh Social Media hrang hrangah rang tak leh thu dik tak chauh pechhuak thin turin a fuih a, mipuite rin ngam ni thei turin a fuih bawk a ni.

Hei bakah hian IPRP&S Minister chuan saptawng-a thu chhuah thin media te chu Mizoram Tourism than nasatzia tarlang tam tura chah bawkin, Aizawl khawpui chu Traffic dan leh hrai ngai pawimawh thin khawpui a nihna te, Honking Free leh Silent City a nihna te, khualzin hmeichhia te tana hmun him ber pawl a nihna te tarlang tam turin a chah a. Thenzawl Peace City-a Golf Course leh Ropeway Project cheng vbc. 36 man tura duan mek te chu India ram pumpui tan thu lawmawm a nih thu a sawi a. Heng bakah hian Mizoram chu Winter Capital of India atana hmun duhawm a nih thu leh Indian Tourism Development Council (ITDC) leh Central YMA nena thawkho-a ‘Tribal Homestay’ a kalpui leh Sustainable Tourism lama a hmalakna dangte chu puang darh nasa turin Media te chu a fuih bawk a ni.

Inter-Media Publicity Coordination Commitee (IMPCC) thutkhawm nimin-a neih ah hian an Chairman leh DDK (News) Mizoram Director Nampibou Miranmai IIS pawhin IMPCC chu media te leh sawrkar department hrang hrangte thawhona platform pawimawh tak a ni tih sawiin, IMPCC hmang hian mipuite hnena thuthar semchhuah kawngah media hrang hrangte chu thawhhona tha an neih ngei theih a beisei thu a sawi bawk.

IMPCC hi Ministry of Information & Broadcasting in a din niin State tina Media te nen thawkhoin sawrkar Department hrang hrang hnathawhte mipui hnena puanchhuah kawngah hna a thawk thin a. Nimin thutkhawm ah hian Mizo tawng bakah English leh Hindi-a thu chhuah tam te, Mizote GST lam inhrilhriat tam te, ruihtheih thil thatlohna hawi zawng information pekchhuah tam te sawiho a ni.