Health Minister Lalrinpuii'n Kolkata-a Manipal Hospital leh Kolkata Kidney Institute a tlawh

Health Minister Lalrinpuii chuan Inrinni khan Kolkata-a Manipal Hospital, Broadway, Salt Lake leh Kalikata Road-a awm Kolkata Kidney Institute te chu a tlawh.

Manipal Hospital, Broadway, Salt Lake a awm hi Superspeciality Hospital niin Mizoram Sawrkar Empanelled Hospital a ni a. Mizoram House (Salt Lake) bul lawka awm niin Mizoram atanga damlo kal ten an pan nasa in a tangkai hle a. Health Minister hian an Facilities neih hrang hrangte a hmun ngeia a enpui bakah Mizoram atanga damlo awmte a kan nghal bawk. Manipal Hospital hian India ram pumpuiah Hospital 49 an nei mek a, chung zinga Hospital 5 chu MUHCS hnuaia Empanelled mek niin India ramah chuan Hospital nei tam leh tha ber te zinga mi a ni.

Health Minister hi Unit Director Kakali Mukherjee leh a Team te bakah Dr. Smartha Pulai leh a Team ten an lo dawngsawng a. Mizoram atanga damlo tam zawk an enkawl theih nana hmalakna thar hrang hrang an neih te an lo hrilhfiah a, damlo khum-in a daih loh avanga Day Care Centre an hawn belh atanga khum 35 chu Mizoram damlo tan bika an ruahman thu te an lo hrilh a. Experience nei Mizo Nurse tam zawk chu thawk tura lakbelh an duh reng lo sawiin, hemi chungchangah hian Minister chuan August thla chhunga Recruitment buaipui tura lo zin turin a sawm bakah Mizoram atanga damlote duat tak leh uluk taka an lo enkawl avangin lawmthu a hrilh nghal bawk a ni.

Hemi hnu hian Kidney Transplant Doctor experience rei tak nei tawh rualin an din - Kolkata Kidney Institute chu tlawh lehin Minister hi Director Dr. Pratik Das leh Senior Consultant Dr. Keshab Sil bakah Consultant (Nephrologist) Dr. Amar Pratap Singh leh Nursing Superintendent Chaitali Das Pradhan ten an lo dawngsawng a. Kidney transplant lama experiance nei tha tak tak Doctor leh thawktuten man tlawm zawka kidney transplant an kalpui dan te a hmunah an lo enpui a. He hospital hi Mizoram atanga damlo, Kidney Transplant mamawhte tana tangkai taka hman a nih theihna turin inbiak chhunzawm zel nise an ti a ni.

Health Minister Lalrinpuii hi Zirtawpni khan West Bengal Health Minister thar Dr. Sharadwat Mukherjee nen inkawmin hriselna kawnga India hmarchhak lam State hrang hrang ten tangruala hmalak ho theih dan tur leh Minister te inhmuhkhawm theih dan tur kawng zawn nise tha an tih thu an sawidun a, West Bengal sawrkar in Health Insurance kalpui a tum dan tlangpui te lo hrilhin, mipui te tan MUHCS tha a tih thu te pawh a lo sawi a. Minister Lalrinpuii chuan West Bengal a State sawrkar thar lo piangah beiseina sang tak an neih thu hrilhin, an State chhunga Minorities te thlamuang taka an awm theih nana hmala turin a ngen a, a bik takin tunhnaia West Bengal, Subhasgram a Kristian te Biak In suasam a nih chungchangah pawh theihtawp chhuaha hmalak pui turin a ngen nghal bawk a ni.