GST hman tirh atanga a thanna 307% a tling
Press Information Bureau (PIB) in tunhnaia 'One Day Media Workshop on 12 Years of governance on employment generation and economic reforms under GST' tih Mystic Hills Hotel, Chaltlang-a an buatsaih tuma Taxation Department hotu ten an tarlan danin India ram puma GST hman anih hma chuan sawrkar laipui leh State ten Chhiah chi hrang hrang la in hei hian harsatna tam tak a siam a. Mahse GST dan hman anih hnu chuan Check Gate siam thin te tih bo a niin bungraw kal vel pawh a chak a, Chhiah hmuh pawh a pung tih an sawi a. GST chuan hna thar engemaw zat a siam tih sawi bawkin Mizoram chhungah GST buaipuitu (practioner) mi 29 an awm a, India ramah 'One Nation, One Tax, One Market' hman a ni tih an sawi.
Tunhnai kum 3 emaw kalta chhunga GST bikah Mizoram sum hmuh a tlakhniam chhan chu hmasawnna lian tham hnathawh a tlem vang niin Taxation Department hotute chuan an sawi a. “Mizoram-a Central Scheme hnuaia hnathawh liantham Rel kawng siam te, kawngpui laih hna te thawh zawh a ni tawh a. Hnathawh lai kha chuan heng hna thawktu Contractor te atangin sum tam tak tak hmuh thin a ni a, mahse an zawh tawh avangin sum hmuh hi a tlem chho ta,” an ti bawk
Taxation Department thawktute chuan kan thil lei Rs. 200 chin chunglamah sumdawng ten Tax Invoice an pe tur a ni a, Rs. 200 hnuailam pawh nise thil leitu in Tax Invoice a phut chuan an pe tur a ni tih an sawi a. “Tax invoice a awm loh chuan sumdawng ten chhiah dik tak an chhunglut em tih hriat a har bakah an awl thei bawk a. Tax invoice pechhuak lo hremna a awm a, pawisa chawi pawh a tam hle a. Nikum October khan hetiang ti lo an awm leh awm loh hma kan la a, cheng nuai chuang fe chawi te pawh an awm a ni,” an ti a. A hma chuan bungruate kan state an luh dawnin endik a, chhinchhiah thin a ni a. Tunah erawh chhinchhiah anih tawh loh avangin thil dik lo ti duh tan tih theih a ni, an ti a. Online lama thil kan lei pawhin tax invoice hi tarlan zel a ni tih an sawi bawk.
GST atanga sum hmuh chu dan tlangpuiin Fur laiin a tlem tih Taxation Department hotute chuan an sawi a, hei hi a chhan ber chu ruahsur vanga kawng a chhiat thin vang leh bungraw phur lirtheite an kal tam loh vang niin an sawi a. “Mahse Rel kawngin Mizoram a pawh tak avang leh Rel hmanga bungrua lut a tam tawh avangin sum hmuh hi a tlem lutuk lo turah kan ngai a ni,” an ti a. Lirthei atanga chhiah lak tih hniam anih hnuah a leitu an pung nia an hriat thu an sawi bawk.