Grassroots Sports Development Programme zirchianna hrang hrang awmna report tlangzarh

Mizoram State Sports Council (MSSC) leh Samagra Shiksha Mizoram in 'convergence' a an kalpui Grassroots Sports Development Programme zirchianna hrang hrang awmna report chu nimin khan Sports & Youth Services Minister Lalnghinglova Hmar chuan a Pisa-ah a tlangzarh.

Grassroots Sports Development Programme Report bu tlangzarhna hunah hian Sports Minister chuan Grassroots Sports Development Programme chu an hmalakna phurawm ber zing ami a nih thu sawiin, “Mizoram State Sports Council leh Samagra Shiksha Mizoram te'n tha taka an kalpui niin hmasawnna tha tak a ni,” a ti a. “Zirna In-ah naupangten infiamna inzirtirna tha an dawng thei hi a tha in, a rah hi tun atanga kum nga-ah chuan kan hmu tawh dawn a ni,” a ti bawk. Sports Minister chuan Grassroots Sports Development Programme chu thui tak thlir chungin State leh naupangte mamawh mila herrem a ni tih sawiin, “Zirna tibuai si lovin, infiamna lama hmasawnna tur kalpui a ni a, naupang talent haichhuahna leh tihhmasawnna kawnga hma lak a ni,” a ti a. “GSDP report hian a fawmkim hle a, data kimchang tak tak kan neihte hi hmalam kan pan zelna turah a chhenfakawm dawn hle,” a ti bawk.

GDSP hi Mizoram-a District 11-a Training Centre 46-ah kalpui niin Sports discipline hrang hrang pakua-ah naupang 1380 an inziaklut a. Heng zinga 34% chu hmeichhe naupang an ni. Report-ah hian GSDP kalpui dan bakah thuk zawka zirchianna kimchang tak 'Comprehensive Sports Analytics and Talent Assessment Report' a tel a. Naupangte bakah Training Centre leh sports discipline hrang hrangte dinhmun chu metric mumal tak hmanga zirchian a, score pek vek a ni.

Grassroots Sports Development Programme (GSDP) kalpui tur hian January 13, 2015 khan Mizoram State Sports Council (MSSC) leh Samagra Shiksha Mizoram (SSM) ten inremna an ziak a. Kum 2025-26 chhungin zirlai naupang kum 6 - 14 inkarte infiamna nihphung leh bulthut inzirtirna a ni a. Kar khatah nithum aia tlem lo training nei thinin School chawlh-ah uar zawkin kalpui a ni a, naupangten thla 6 chhungin minute 9,000 bawr vel training an nei nia ngaih a ni.

GSDP Report tlangzarhna hun hi Mizoram State Sports Council-a Secretary, Henry C. Lalrawnkima chuan kaihruaiin Samagra Shiksha Mizoram-a State Project Director C. Lalthanzira chuan GSDP kum khatna tha taka kalpui a ni chu lawmawm a tih thu leh zawngchhangtlak tak nia a hriat thu a sawi a. GSDP Programme Coordinator, Hmingthansanga chuan GSDP report khaikhawmna pein zirchianna kimchang tak an neih atangin naupangte zinga infiamna lama theihna a awmdan leh hmasawn zelna tura hmalak a tulnate chiang taka a lan thu a sawi a. Hei bakah hian Coach-ten infiamna piah lamah naupangte chu an chenna ah te tlawhin an nu leh pate nena inbiaknate an neihpui a, nungchang leh hriselna lama zirtirna te an kalpui thin thu a sawi bawk.