‘Ginger Capital of India’ ni turin Sawhthing thar tam ti

Commerce & Industries Minister F. Rodingliana chuan Mizoram in ‘Ginger Capital of India’ ni thei tur khawpa Sawhthing a tharchhuah nasat thu a sawi.

Zirtawpni kalta July 3, 2026 khan New Delhi-a Vanijya Bhawan-ah ‘Board of Trade Meeting’ chu Union Minister of Commerce & Industry Piyush Goyal leh Minister of State for Commerce & Industry Jitin Prasada-te kaihhruaia neih niin Mizoram atangin Commerce & Industries Minister F. Rodingliana chu telin Sawhthing leh Mau sawngbawlna leh Mizoram-a industry hmasawnna tura mamawh leh tulte a thlen a. Minister chuan Mizoram in ‘Ginger Capital of India’ ni thei tur khawpa Sawhthing a tharchhuah nasat thu sawiin, a hralhchhuahna leh a sawngbawlna tur, Processing Unit lian tham din kawngah Ministry puihna a mamawh thu a thlen a, Mizoram Mau te chu textile leh paper industry atana chhawr tangkai dan dappui turin a ngen bawk a ni.

C&I Minister hian Board of Trade Member te leh C&I Ministry hotute hnenah India Sawrkar in Kaladan Multi-Modal Transit Transport Project (KMTTP) a buatsaih mek, a puitlin tep chu State dang leh India rawn pawn thlenga insum-dawn tawnna kawngah Mizoramin a chhawr tangkai ngei theihnan ruahmanna siamsak turin a thlen a. Agartala atanga hmui lova Mizoram-ah MSME-DFO office hawng turin ngenna a thlen bawk.

Board of Trade hi Foreign Trade Policy, Export Promotion leh Manufacturing lama India Sawrkar kawng kawhhmuh tura Apex Body din a ni a, Directorate General of Foreign Trade (DGFT) hnuaiah awmin, Member ah hian Sawrkar Official bakah Industrialist leh India company lian hotute, Banking, Logistics, Manufacturing leh IT lama mithiam bik te, Industry Chambers leh Exports Council hotute an tel a ni. C&I Minister hi Dr. H Lianzela IAS chuan a tawiawm a ni.