END Minister leh NCB Director General an inkawm

Excise & Narcotics Department changtu Minister Lalnghinglova Hmar leh Narcotics Control Bureau-a Director General, Anurag Garg IPS te chu nimin khan New Delhi-ah inkawmin Mizoram-a ruihhlo do kawnga hmalakna kal mek leh hmachhawp hrang hrangte an sawidun.

New Delhi-a Narcotics Control Bureau Director General Office-a an inkawmna ah hian Excise & Narcotics Department Minister Lalnghinglova Hmar chuan ruihhlo do kawngah Excise & Narcotics Department in awmze neia theihtawp a chhuahna chuan rah tha a chhuah mek tih sawiin, “Kum hnih emaw lek chhungin Heroin No. 4 man nasa takin a sâng tawh a, sawrkar Department leh tlawmngai pawlte thawhho that zarah ruihhlo man zat pawh a pung zel a. Ruihhlo hi a rem ta a ni lo a, a hma anga a tlawm ta lo hi a vang sawt ni ah kan ngai,” tiin, Kohhran leh khawtlang nen tangrualin ruihhlo ti lo tura inzirtirna pawh kalpui reng a nih thu a sawi bawk.

Minister Lalnghinglova Hmar chuan Narcotics Control Bureau puihna hrang hrangah lawmthu sawiin “Tunhnaiah NCB atangin ruihhlo dona a hman atan motor engemaw zat kan dawng a, tangkai taka hman mek a ni. Mizoram chu Myanmar ramri depa awm, India rama ruihhlo rawn luhna kawngka pakhat a nih avangin ngaihpawimawh a ngai a. Excise & Narcotics Department in Ministry zawmpui a neih ve loh avangin chak zawk leh awmze nei zawka hma la turin NCB nen thawhhona tha zawk kan neih zel a ngai a ni,” tiin ruihhlo donaa hman tur motor mamawh belh a nih thu a thlen nghal bawk.

He hunah hian NCB Director General Anurag Garg chuan ruihhlo do kawnga Mizoram hmalaknate chu an lo hriat thin thu leh lawmawm a tih thu sawiin, Excise Minister thu thlente pawh theihtawp an chhuah tur thu a sawi a. Aizawl-a NCB Zonal Office dinna turin approval a awm tawh tih sawiin, a tihhlawhtlin kawnga hma lakpui turin Mizoram Excise Minister chu a ngen nghal a ni. Hei bakah hian NCB Director General Anurag Garg chuan  ruihhlo zuar leh tawlh mante chu an phu tawk hremna pek ngei a pawimawh tih sawiin, chumi atan ND&PS Act 1985 hnuaia Special Court din leh, man nawn fo (habitual offender) te khuahkhirh theihna dan hman tangkai tha a tih thu a sawi bawk.

Nimin-a Excise & Narcotics Department Minister leh NCB Director General inkawmna ah hian ruihhlo do kawnga tangkai tak, sawrkar hnathawk leh informer te Cash Award dawn thin NCB a awm mek chungchang pawh sawiho a ni bawk a. NCB atangin Additional Director General, Vineet Vinayak IPS leh Deputy Director General (Operations, Enforcement, and Operational Coordination), Neeraj Kumar Gupta IPS te an tel bawk a ni.