Draft Roll-ah Vote nei 8,28,906 awmin Mizoram-ah Polling Station 1352 awm tawh dawn

Election Commission of India (ECI) thupek anga Special Intensive Revision of Electoral Roll 2026 chu Mizoram-a Assembly Cconstituency 40-ah thawh zawh niin Draft Roll tarchhuah a ni ta a, Mizoram pumah voters 8,28,906 awmin Polling Station thar 52 siam a niin pakhat paih a ni a, Polling Station 1352 a awm tawh dawn a ni.

Inrinni khan Aizawl-a I&PR Conference Hall-ah chanchinbumite kawmin Chief Electoral Officer (CEO) Garima Gupta-i chuan Special Intensive Revision, 2026 Phase thumna kalpui mek chungchang a sawifiah a. CEO chuan Special Intensive Revision (SIR) of Electoral Roll 2026 chu May ni 20, 2026 atang khan Mizoram-ah kalpui tan a ni tih sawiin, a tira Election Commission of India ruahmanna ang chuan Draft Electoral Roll tarchhuah hi ni 05.07.2026 tur a ni a, amaherawhchu Pathianni (Sunday) a nih avangin CEO Office, Mizoram ngenna angin ni 04.07.2026 (Inrinni) ah sawn a ni tih a sawi. CEO chuan, “May ni 30,2026 atang khan Enumeration Phase kalpui tanin BLO ten Intin an tlawh a, Enumeration Form sem, lakkhawm leh Digitization an kalpui a. Enumeration Phase chhunga Form semchhuah zat hi 8,75,068 niin lakkhawm zat hi 8,28,906 a ni a, form lak let theih loh 46,163 (5.28%) a awm a. Heng te hi boral tawh 21,295 (2.43%), Awmna chin hriat loh 8,333 (0.95%), hmun danga pem 13,978 (1.60%), Electoral Roll a thun tawh 2,248 (0.26%) leh a dang 309 (0.04%) te an ni,” a ti.

CEO chuan SIR kalpui mekah Mizoram chuan a ti tha tih sawiin, “SIR 2026 Third Phase kalpui mek zingah Mizoram hi Enumeration form 100% digitization zo hmasa ber niin, June ni 25, 2026 khan zawhfel a ni a. 22-Tuichang (ST) Assembly Constituency, Khawzawl District huamchhunga Part zawng zawngah June ni 14, 2026 khan Digitization zawhfel niin, Assembly Constituency leh District Level-ah Mizorama Enumeration Form Digitization zo fel hmasa ber an ni a. Tun dinhmuna Enumeration Form Digitized hi 8,28,906 a ni a. Heng Enumeration Form Digitized te hi Draft Roll-ah pawh an chuang chhunzawm dawn a ni,” a ti bawk.

Draft Roll-a awm lo te tan Electoral Roll a inthunluh dil theih a ni tih sawiin CEO chuan, “India khua leh tui dik tak, ni 01.07.2026-a kum 18 tling tawhte chuan mahni bialtu ERO/AERO/BLO hnenah Electoral Roll-a inthunluh dilna thehluh chhunzawm zel theih a ni a. Dilna hi https://voters.eci.gov.in leh Voter Helpline App atangin thehluh theih a ni bawk a ni.

Draft Electoral Roll hi EROs, AEROs, BLOs leh DC/DEO Office-ah leh CEO's website https://ceo.mizoram.gov.in/ ah en theih a ni a, political parties te pek vek tur a ni bawk.

July ni 4, 2026-a Draft Roll tlangzarh a nih atang hian claims and objection period chu July ni 4, 2026 atanga August ni 4, 2026 thleng hawn a nih thu pawh sawiin, “Tun thlengin Special Intensive Revision 2026 kalpui dan chungchangah harsatna lian tham kan la tawk lova. Official zawng zawngte inpekna leh khawtlang hruaitute leh vote nei zawng zawngte thawhpuina ah lawmthu kan sawi a, Revision hi a hun takah tluang taka zawh theih kan inbeisei,” a ti bawk.

* Draft Roll tarchhuah a voters awm zawng zawng 8,28,906 zinga 3,99,025 hi Mipa an ni a, Hmeichhia 4,29,881 an awm bawk.

* Mizoram pumah Service Voters Mipa 4091 leh Hmeichhia 94, an vaiin 4185 an awm. 

* Mizoram pumah Enumeration form lak let theih loh hi Aizawl South II ah tam berin 2,351 (8.23%) a awm.

* Electoral roll-a inthun thar duh tan form hi BLO hnenah lak theih a ni.

* Ruahman lawk ang chuan September 6, 2026-ah Final Roll tarchhuah a ni ang.