District Hospital Serchhip ah khum 41 awm thei ta
Kumin June 15-a Chief Minister Lalduhoma’n a hawn tak District Hospital, Serchhip-a Makeshift Building hi nimin khan LENKAWL chuan a hmunah tlawhin thawktu ten he Building hman tangkai a nih dan te an lo hrilh a. He Damdawi In-a thawktute chuan khum 15 awmna tura ruahman he Building thar ah hian tun dinhmun ah khum 12 dah a nih thu leh a chhawng hnuai ah khum 6 leh a chungah khum 6 bawk dah a ni tih an sawi a, nimin-a helai hmun tlawh a nih lai hian a chhawng hnuaia khum 6 chu khat vekin a chungah hian damlo pakhat a awm bawk a ni.
District Hospital Serchhip-a thawktute Makeshift Building thar hi Medicine Ward atan hman mek a ni tih sawiin, hetianga Medicine Ward thar siam a nih takah chuan a hmaa Medicine Ward atana hman thin, TRAUMA Building a mi chu Gynae Ward atana hman a nih dawn bakah Postnatal Ward atan leh Neonatal Ward atan hman tura ruahman a ni tih an sawi a. Hetianga Ward siamrem a nih hnu hian TRAUMA Ward-ah Khum 10; Medicine Ward-ah khum 12; Paediatric Ward-ah khum 9; Gynae Ward, Postnatal Ward leh Neonatal Ward-ah khum 10; a vaiin khum 41 a awm tawh dawn a, hei bakah hian CD (Clinical Decision) Observation-ah khum pahnih awm bawkin hemi nen hian a vaiin khum 43 a awm thei dawn ta a ni.
Tarlan tawh angin District Hospital Ser-chhip-a Makeshift Building hi Lok Sabha MP in MP Fund cheng nuai 20 a pek bakah NEDFi CSR Fund atanga sum hmuh cheng nuai 17.3 senga sak a ni a. District Hospital Serchhip sak hna thawh mek a nih avanga Khum indaihlohna awm mek sutkianna tura Serchhip Joint VC te hmalakna hnuaia sak a ni.