Department-a thawktute zarah Agriculture Department hmel a mawi tawh hle - Agriculture Minister
Agriculture & Farmers' Welfare Department hnuaia Scheme hrang hrang hmalakna thlirletna hun ‘Review Meeting’ chu nimin khan Aizawl-a Directorate of Agriculture & Farmers' Welfare Conference Hall-ah neih niin he hunah hian Agriculture & Farmers' Welfare Department changtu Minister PC. Vanlalruata chuan Agriculture Department hnuaia thawktute thawhrimna zarah Agriculture Department hmel a mawi tawh hle tih sawiin, Mizoram-ah Green Revolution a thlen ve theih nan kalkhawmte chu tan la turin a chah a, “Hnathawhna ah mahni mawhphurhna chu 100% kan pe thei lo a nih pawhin 90% tal pe thei turin tan kan lak a ngai a ni,’ a ti. Agriculture Minister chuan an Department hnuaia Scheme tam tak an neihte tihlawhtling tura rinawm leh thahnemngai taka mipuite tana thawk chhunzawm zel turin thawktute a chah a; hmasawnna tluantling a awm theih nan hmun hrang hranga Scheme kalpui dan enfiah reng a pawimawhzia leh sawrkar hnathawkte chu loneitute kaihruaitu an nih ngei a tul thu a sawi a. Thlai tharah hma kan sawn viau rualin, loneitute tan 'Value Addition’ kalpui chhoh zel a tul thu a sawi tel bawk.
Agriculture & Farmers' Welfare Department Review Meeting hi an Department changtu Secretary Ramdinliani chuan kaihruaiin, kum 2025-26 chhunga District Agriculture Officer (DAO) Office te hmalakna hrang hrang bakah SAS Hnahthial, Krishi Vigyan Kendra (KVK), Crop Production Programme, Price Support Scheme, Mizoram Agriculture Marketing Board (MAMB), Green-Ag leh TRIBES hnuaia hmalakna te a sawi a. July ni 9 hian Centrally Sponsored Scheme (CSS) leh Central Sector Scheme (CSS) hnuaia Department hmalakna hrang hrang leh 2026-27 chhunga hmalak dan tur Annual Action Plan sawiho leh tur a nih thu a sawi bawk.
He hunah hian Agriculture & Farmers' Welfare Department Director, Vanramthangi pawhin Agriculture Sector chu Mizoram thanna kawngah a pawimawhzia a sawi a. Buh leh thlai dang tharchhuahna kawngah tan lak a ngai hle tih sawiin, Scheme hrang hrangte tangkai taka hmang turin kalkhawmte a fuih a. Pulses, Oil Seeds leh thlai chi tha sem chungchângah loneituten hma an lak that theih nan an harsatna neihte enpui a, hriatpui vek turin thawktute a chah a. Hnathawh zawng zawng tha taka 'Documentation' neih a pawimawhzia leh Hlo Tûr leh lei tihthatna pek dan dik chungchângah inzirtirna tha zawk neih a tul thu a sawi bawk.
He Review Meeting-ah hian Agriculture & Farmers’ Welfare Department hnuaia Secretariat, Directorate, District leh Block-a thawktu hrang hrang bakah Agriculture & Farmers’ Welfare Department hotute leh mi pawimawh dangte an tel a ni.