Dan lo a Family Pension la chhui tur Task Force din Mizoram pum an tuam dawn

Mizoram sawrkar hnuaia document dik lo hmanga Family Pension la, huntiam chhunga in surrender lo te chhui chhuaktu tur 'Task Force' din a ni a, Mizoram pumpui an tuam vek dawn.

Thudawn danin, document dik lo hmanga Family Pension la, huntiam chhunga in surrender lo te chu Task Force in an chhui chhuak a nih chuan dan angin an chungah hremna lekkawh a ni dawn a. Hetihlai hian dik tawk lo a Family Pension la huntiam chhunga in surrender te chu ngaihnathiam/rulh tir an ni lo dawn lo thung a. Finance Department tarlan danin, dan dik tawk lo a Family Pension la in report-na hmun tur chu mahni Family Pension lakna Treasury Office-ah a ni. Finance Department chuan dan dik lo a Family Pension la, in surrender lo te chu chhui chhuah tak tak an ni dawn tih tarlang bawkin, Task Force in an chhui dawn thu leh Mizoram pumpui an tuam chhuah tur thu an tarlang a ni.

Tunah hian Mizoram sawrkar hnuaiah pension benefit dawngtu hi mi 39,954 an awm mek a, heng zingah hian Superannuation Pension la mek 22,139 leh Family pension la mek mi 11,194 an awm a. Pension chi dang latu Centralized Pension Processing Centre (CPPC) kaltlanga la 5629, Voluntary 594, VRS 289, Invalid 69 leh Compulsory mi 40 te an awm a ni. Sawrkar chuan dik lo taka Family Pension latute tan mahni duhthu ngeia sawrkara pekkir (surrender) na hun July ni 1 atanga September ni 30, 2026 chhung a hawng mek a, mi thenkhat chuan an PPO te an pe kir tawh nia sawi a ni. Hemi hun chhunga pekir lo te dapchhuah hna hi thawh chhunzawm a ni anga, document lem hmanga hetiang thil tih tumna hi a awm zui zel loh nan zau taka Awareness kalpui a ni bawk ang.

Tarlan tawh angin tun thla ni 15 khan dan dik lova Family Pension laten an Pension Payment Order sawrkara pe kir tura hmalakna bultanna, Statewide Kick-off Programme on 'Sensitization of Voluntary Surrender of Pension Payment Order (PPO)' chu neih a lo ni tawh a. He hunah hian Chief Minister chuan Mizoram sawrkar hnuaia document dik lo hmanga Family Pension la mek zawng zawngte chu ngaihhnathiamna hun hawn chhunga anmahni duh thu ngeia bansan (surrender) turin a lo ngen tawh a ni.