Congress in Restricted Tender an pawngsual lo tih sawi

Mizoram Pradesh Congress Committee (MPCC)-a PAC Member leh MLA hlui, TT. Zothansanga chuan Congress sawrkar in Restricted Tender an pawngsual ve lo niin a sawi.

    Congress Party in nimin-a Aizawl Congress Bhavan-a Political Session an neih ah TT. Zothansanga chuan Congress Sawrkarin a tulah chauh Restricted Tender an kalpui thu leh ngaimawh tham a awm lo nia sawiin, “Public-ah pawh sawi a awm lo tluk a ni a, Restricted Tender kan pawngsual ve lo,” a ti a. MNF-in an rawn uar hle nia sawiin, “PWD leh Sports Department-ah chauh pawh Rs. 8,62,12,49,814/- Restricted Tender an inpe a, CM chhungte pahnih – Kamrula leh Zoramchhana te (Rs. 1,37,15,35,820 + Rs 74,75,98,928) phei chuan Rs 2,11,91,34,748/- zet duhsakna uchuak an hmu a ni,” a ti a. Tuna sawrkar chungchang sawiin, “Kar lovah Consultancy Firm 328 an Empanelled nghal a. SASCI sum cheng Vbc. 629.17 leh 328 = (Rs. 957.17 Cr) Blanket Approval-in CM-in a pe vat a, hei hi Mizoram Contract hnaa World Record a ni. CM kaltlangin hna 135, cheng vbc. 986.71 an inpe tawh a ni,” a ti bawk.