CM hovin DP&AR hmalakna thlirletna neih a ni
Department of Personel & Administrative Reforms hian General Service Wing, Administrative Reform Wing, Secretariat Service Wing, Civil Service Wing leh MPSC te enkawlin sawrkar hnathawk zawng zawngte viltu a ni a. Chief Minister chuan hetianga a mawhphurtute thutkhawma hmasawnna tur thil pawimawhte sawiho hi tul a tih thu sawiin, “Sawrkar hna hi tluang takin kal se, kan ram hian hmasawnna hi hmu mawlh mawlh ila kan duh a, siam that ngai chu siam tha turin theihtawp kan chhuah tlang dawn nia,” tiin kalkhawmte chu a chah bawk.
He hunah hian DP&AR changtu Commissioner & Secretary, Udit Prakash Rai chuan DP&AR hnuaia kal Wing hrang hrangte leh MPSC hnathawh dante chipchiar takin a sawifiah a. Sawrkar hnathawkte kaisanna mumal zawka kalpui a tul dan te, online hmanga sawrkar hnathawkte vilna te, post ruak zat leh hnawhkhah mek awmzat endikna tur rawtna an neih te a tarlang a. MPSC hian sawrkar kum 2025-26 chhungin Exam vawi 142 an kalpui a, result chi 57 an puang hman a, DPC pawh vawi 292 an thu a ni. Tunah hian Department zawng zawng hian hna hniam lam pawh MPSC zelin la se an duh tawh avangin MPSC tihchaka hnathawktu tam zawk pek chuan kawng danga sawrkar hnalakna kalpui aiin sawrkar sum leh pai senso a tlem zawk a, chak taka bawhzui a tul thu tarlan a ni.
Hei bakah hian Joint Secretary, . Lalhmingthanga chuan Good Governance and Training Wing chungchang sawifiahin, GGTW hi Administrative Training Institute (ATI) enkawltu a ni a. Right to Public Services Act chu online-a kalpui niin a hman theih tawh a, Right to Public Services-ah hian tihhlawhtlin theih service chauh dah a pawimawh thu sawilan a ni.
February ni 16, 2024 a Chief Minister-in a hawn tawh ‘Mipui Aw’ ah mi 672 in an lungawi lohna an thlen tawh a, case 613 chinfel tawh niin chinfel mai theih loh, chhan harsa, hun duh rei chi hi 45 a la awm mek a, e-office chu Secretariat-a Administrative Department zawng zawngin an kalpui tawh bakah Department dang pakuain an hmang tawh a. Sawrkar Department te chu e-office hmang vek tura hriattir an ni tawh a ni. ATI hian sawrkar kum 2025-26 chhungin Training chi hrang hrang 84 kalpuiin mi 2389 an tel a. ATI hian Organised Service Officers te hi a huho zelin training pe tawh se, training an zawh rualin IIPA hi a huho vekin tlawh zel tawh se tha an ti a. Heng bakah hian sawrkar hnathawkte training chungchang te, felfai zawka inenkawlna tur rawtna te leh hmachhawp hrang hrang an neihte an sawi bawk a ni.