Chief Minister hova Mi-PRAGATI thukhawmin Mizoram-a hmasawnna hnathawh dinhmun an thlirho

Mizoram-a hmasawnna hnathawh hrang hrangte a hun taka a nih dan tur anga zawhfel a nih theihna tura vil leh enkawl zui tura din, Mizoram Pro-Active Governance and Timely Implementation (Mi-PRAGATI) chu nimin khan Chief Minister Lalduhoma kaihhruaia thukhawmin Minister thenkhat leh sawrkar mi pawimawh te an tel a ni.
Chief Minister Conference Hall-a Mizoram Pro-Active Governance and Timely Implementation (Mi-PRAGATI) thutkhawm vawi 4-na neih ah hian Mizoram-a hmasawnna hnathawh hrang hrang dinhmun thlirho niin Aizawl Western Side By-Pass Road laih meka harsatna awm mek, Dumping site chungchang te, zangnadawmna la tihfel lohte, Refugee-te awmna sawn chungchang leh Forest Clearance chungchangte sawiho niin thutkhawm hmasa lama an lo sawi tawh an bawhzui tawh chinte an tarlan a ni a tih tur la awmte chu chak taka bawhzui zel nise an ti a. Hnathawh dan tur tihdanglam ngai (change of scope) awmte pawh an sawilan a ni bawk.

Hei bakah hian Vairengte - Sairang Section of NH 306 & 06 (Four lane) hmalak mek pawh thlirho niin thutkhawm vawi thumna leh tun inkarah hna hi zaa pahnih (2%)-a hmasawn hman a nih thu tarlan a ni a. Tun thlengin Package 3 chinah hna hi 19.25% zawh ni tawhin Package 4-ah 17.82%, Package 5-ah 14.90%, Package 6-ah 8.76%, Package 7-ah 13.67% leh Package 8-ah 14.12% te thawh tawh (physical progress) a ni a. Hmun thenkhatah ram neitu nih inchuhna Court thubuai awmin Court thutlukna nghah mek a ni a. Tuna kawng awmsa hi Short Term Maintenance Contract hmanga siam mek ni bawkin hnathawh turte hi an thawk zo tep tawh tih tarlan a ni bawk.

Ekta Mall sak mek chu tluang taka kalpui a nih thu he hunah hian tarlan niin Overall physical progress chu 21% a ni tawh tih tarlan a ni a, tunah hian an hmanruate test-na tur Laboratory an bun fel tawh a, an hmanraw mamawh leh khawl mamawh zawng zawng an lakhawm tawh nia report a ni a. Khamrang - Selesih kawng laih meka harsatna awmte thlirho niin Forest Clearance chungchang te, PIL lut chungchang te leh zangnadawmna lama harsatna awmte sawi a ni a. A thawhna sum NABARD RIDF chu a tawp tawh avangin he kawng hi thawk zui zel tur chuan State sawrkar sum hman a ngai tawh dawn tih tarlan a ni bawk.

Neihloh khaw sawn chungchangah tunah hian chhungkaw engemawzatin an In thar tur sak hna an tan tawh tih tarlan niin Vantlang hmunhma pawimawh din hna pawh thawh tan thuai theih beisei a nih thu leh a panna kawng fomation cutting chu 90.93 % thawh zawh tawh a nih thu tarlan a ni bawk. Sihhmui kawngpui atanga Sairang Rel Station panna kawng tihzauh hna leh Suaka Cricket Stadium panna kawng siam chungchang pawh sawiho niin a rang lama bawhzui nise an ti a ni.