Chhul hmawr Cancer venna atan vaccine pe mek

Lunglei District-a hmeichhe tleirawl kum 14 atanga kum 15 inkar mi 1,326 te chu Human Papillomavirus (HPV) vaccine lak tir an ni tawh a, hei hi vaccine la tura beisei aiin an tam tawh zawk a ni.

India ram puma Chhul Hmawr Cancer thlentu, Human Papillomavirus (HPV) laka invenna tur vaccine a thlawna pek runpui hi kumin February 28 atang khan kalpui niin May 31, 2026 thleng khan Lunglei District-a hmeichhe tleirawl kum 14 atanga kum 15 inkar mi 1,326 te hnenah vaccine hi pek a ni tawh a. Lunglei District-ah hian he vaccine pek tura beisei chu mi 1,243 niin vaccine pek tawh hi an tam zawk a, za zela 107 te chuan he Vaccine hi an la tawh a ni.

HPV Vaccine pek runpui hi thla thum chhung kalpui niin, hmeichhe tleirawl kum 14 pumhlum tawh, kum 15-na hmang mekte hnenah ni tin damdawi In (Health facilities) hrang hrang - PHC, UPHC, Sub-District Hospital leh District Hospital-ah te pek thin a ni a. Lunglei District-ah chuan Sub-District Hospital pakhat (Tlabung) awmin Urban Primary Health Centre (UPHC) pahnih (Sazaikawn leh Hrangchalkawn) leh Primary Health Centre (PHC) panga (Buarpui, Bunghmun, Haulawng, Lungsen leh Tawipui South)-ah te HPV Vaccine hi pek a ni a. Tun dinhmuna HPV Vaccine hman mek hi GARDASIL niin, HPV Strain pali — 6, 11, 16 leh 18 te laka venna a ni a, vawi khat chiu (single dose) zela pek a ni.

Chhul hmawr Cancer hi India rama Hmeichhe Cancer hluar ber dawttu niin, kum tin mi 1,20,000 velin vei tharin mi 80,000 velin an thihpui anga chhut a ni a. Hemi ven nan hian HPV Vaccination Programme hnuaiah hian India ram pumah kumtin hmeichhe tleirawl kum 14 mi vbc. 1.15 chu HPV Vaccine hi pe tura ruahman niin kumin hian HPV vaccine pek runpui hi kalpui tan a ni a. Chhul hmawr Cancer venna a thlawna pek a nih bakah hian Chhul hmawr Cancer endikna (screening) hi Health & Wellness Centre leh a chung lam damdawi inahte a thlawna kalpui mek a ni bawk.