CCM-in FCRA Amendment Bill 2026 duhlohna lantirin Aizawl-ah kawngzawh neih an tum
Council of Churches in Mizoram (CCM) hruaitute chuan nimin khan Aizawl Press Club-ah thuthar thehdarhtute kawmin Foreign Contribution (Regulation) Amendment Bill, 2026 chu Kristian pawl leh NGO hrang hrang, Kristian State-a Chief Minister te hial pawhin Parliament-a pharh lova hnukkir tura vawi duai lo Union Home Minister hnen ngen chung pawha pharh luih an tum tho ni-a a lan thu leh pharh luih a nih chuan thla thar August ni 11 chawhma dar 10:30 atanga chawhnu dar 1:00 chhungin Aizawl Zarkawt leh Sikulpuikawn atanga kawng zawh a Vanapa Hall kawt-a programme hman an tum thu an sawi a. FCRA Bill chu India rama Sakhaw tenau zawk zuitu, a bik takin Kristian-te tan a him lo lehzual a an ngaih thu leh sawrkar laipuiin FCRA kengkawh tura a duan, Designated Authority ten an duh duh danin Kristiante lakah hem an thlak thei dawn ni a an hriat thu te an sawi a, Kohhran leh Kristian pawl te bungrua bakah ram leh Biak In thlenga he Dan hnuaia a him loh thu an sawi bawk a ni.
CCM hruaitute chuan he Dan hi a tlangpui en thuak chuan tha ve fu angin a ngaih theih thu leh chik zawka han zir a, India rama hnam hnufual (minority) te chunga thil thleng tawh leh thleng mek nen en chuan a hmangtu tana hmansual theih thil a awm dawn nia a lan thu sawiin, Ramdang (foreign) atanga tanpuina lo kal FCRA hmanga lo dawnte hi Sakhaw danga inlehtir nana hman (proselytization) phal loh a ni a, he Dan kengkawhtu in hetianga hi an man emaw, an hmu emaw a nih chuan FCRA license cancel sak a, an bungrua leh thil neih chhuhsak vek theih a ni a. ‘Sakhaw danga inleh tir’ tih chhuanlama hmangin India ram hmun hrang hrangah Kristianten tihduhdan leh man an tawk tawh tih an sawi a. Tuna FCRA Amendment Bill hi hman a nih chuan license tih tawp chuah ni lo, foreign sum hmanga In emaw, ram emaw, bungrua emaw an lo neih tawh kha an chan vek thei dawn chu a pawi lai ber a nih thu an sawi bawk a ni.
Hei bakah hian he Dan tharin thuneitu thar awm tura a rel, Designated Authority a vuah chuan thu a nei hle dawn tih pawh sawiin, Court phalna emaw, hriatpuina emaw tel miah lo pawhin Kohhran emaw, NGO emaw te bungrua leh hmunhma neihte chhuhsak a, tihral emaw, hralh theihna thuneihna a nei dawn a, hei hi a him lo a, dan kalphung pangngai bawhchhiatna a ni tih sawiin, an duh lo hle tih an sawi bawk a ni.
Mizoram-a Kohhran hrang hrang 9 telna, CCM hruaitute chuan tunah hian Mizoram-ah FCRA license nei hi 19 an awm mek thu pawh sawiin, Presbyterian leh Baptist chauh Kohhran hming anga nei an nih thu an sawi a. India ram pumah FCRA license nei atangin Kristian pawl hi 12% chauh an nih laiin an Fund dawn zat erawh 55-60% a nih thu an sawi bawk.