Bank Loan rulh that loh te chungchang sawiho a ni

Serchhip District-a sawrkar sum (loan) rul tha lo ten an rulh that theih dan tur leh Serchhip District dinhmun thlirin nimin khan Serchhip District-a Bank Branch hrang hranga hotute chu Addl. DC, Dorothy Muansangi hovin an thukhawm.
He thutkhawm Serchhip DC Meeting Hall-a neih ah hian sawrkar sum puk-a rul tha leh duh lote chungthu (Bakijai Case) chinfel dan tha zawk a awm theih nana hmalak zui dan tur hrang hrang te, Bank leh District Administration (DC Office) leh Police Department-te nena thawhhona tha zawk siam dan tur te, Case report dan felfai leh awlsam zawk neih theih dan tur te, loan rulh that loh kawnga harsatna hrang hrang awm thinte sawiho niin, loan rul tha lo, hriattirna tum hnih pek hnu pawha la ngaihsak tha lo te chu an chungah khauh zawka hma lakzui dan turte rel a ni a. Bakijai Case te chak zawka chinfel a nih theih nan Serchhip-ah chauh ni lo, Thenzawl, North Vanlaiphai leh East Lungdar-ah te pawh Certificate Officer dah belh an nih theih nan hmalak mek a nih thu sawilan a ni bawk.

Hei bakah hian Bank lama thawktu indaih-loh thu te, Agriculture loan leh sawrkar scheme tam zawkah loan dahkham ngai lo thinin, loan ba thin a tih harsat phah deuh nia an hriat thu te, Hearing nei tura kal tha duh lo (absent) an awm thin te chu harsatna langsar zual zingah sawilan a ni a, heng harsatna hrang hrangte hi chak zawka chinfel a nih theih dan turte pawh he hunah hian sawiho a ni bawk.