ASF vanga Vawk thi a pung; Thupek tihchhuah a ni
Serchhip-a AH&Vety Department chhinchhiahna atanga a lan danin nimin khan Serchhip District chhunga khaw pali-ah ASF vanga Vawk thi hi chhinchhiah belh leh niin Thenzawl-ah 29, Chhiahtlang-ah 6, Chhingchhip-ah pali leh Chhuanthar Tlangnuam-ah 3 te a ni a, Thenzawl-ah hian nimin khan hri darh zel tur venna atan Vawk 30 suat a ni leh bawk. Heti hian kumin chhungin Serchhip District chhunga Veng leh khua 20-ah ASF hri hi hmuh a ni tawh a, chhungkaw 459 ten ASF vang hian harsatna tawkin Vawk 1209 zet a thi tawh a, Vawk 933 suat a ni tawh bawk.
Hetianga ASF hri leng a hluar mek lai hian Serchhip District Magistrate, Paul L. Khuma chuan tun thla ni 20 khan Serchhip District-a Vawk lakluh leh thawnchhuah khapna thupek a tichhuak a. He thupek ah hian tunlai hian Serchhip khawchhung bakah khaw thenkhat ah ASF vanga Vawk thi leh Vawk damlo hmuh a nih thu tarlangin, ASF hri a darh zel loh nan hian Section 163 of Bharatiya Nagarik Suraksha Sanhita 2023 tlawhchhanin Serchhip District chhungah ramdang (Foreign Countries), State dang leh District dang atangin Vawk, Vawksa leh Vawksa atanga thil siam reng reng lakluh leh thawnchhuah khap a ni tih a tarlang a. Hei bakah hian Serchhip District-a khua leh khua leh Veng leh Veng te pawh inlakpawlh khap tlat niin Vawk damlo reng reng talh leh hralh khap a nih thu te; Vawk damlo chu dah hran vat tur a nih thu bakah Vawk thi leh damlo reng reng AH&Vety Department-a thawktute hriattir vat tur an nih thu leh Vawk thi reng reng uluk takin disinfectant nen uluk taka phum bo tur a nih thu a tarlang bawk.
He thupek hi chhuah a nih atanga thla hnih (2) huam tur niin thupek zawm lo chu Section 233 of BNS hmanga hrem theih an ni ang.