AMVCA hruaituten Chief Minister lawmthu an hrilh

All Mizoram Village Council Association (AMVCA) hruaitute chuan nimin khan Chief Minister Lalduhoma chu Pisa-ah hmuin thil pawimawh hrang hrang an sawipui.

AMVCA te hian 15th Finance Commission Grants an hmuh kim theih nana Chief Minister hmalakna avanga lawmthu sawiin, Aizawl-ah VC Hostel/Guest House sakna tur a hnena an lo thlen tawh chu a hmun tur an neih tawh thu an thlen a, Chief Minister chuan VC te pawimawhna leh VC Hostel/Guest House tangkai taka hman tur mamawhna a hriat thu a sawi a, a sakna tur tih sak a tum thu a sawi bawk a. Hemi atana thil tul pawimawh a piang chu Department lam pawh in chak taka hma lo la turin a ti a. AMVCA chuan VC lawmman tihpun vat a nih theih nan leh hemi atana theihtawp chhuahpui zel turin Chief Minister an ngen nghal bawk a ni.

Hei bakah hian Mizoram Finance Commission (MFC) Grants kum engemaw zat Budget Allocation a tel thin a taka hman ni tawh ngai lo chu a nihna tur ang taka hman a nih theih nana hmalakpui turin an ngen a, MFC hi hman a nih chuan 16th Finance Commission Grants hnuaiah State Performance Grants kum kal zel turah a tam zawk an dawn theih dawn thu an thlen bawk a. AMVCA in an mamawh an thlente a lo tih hlawhtlin sak zel thin avanga lawmthu sawiin,  AMVCA chuan 15th FC Grants an hmuh kim theih nana theihtawp chhuahtu Chief Minister chu lawmthu sawina thilpek an hlan bawk a ni.