AAP Mizoram in sawrkar an phut thu an sawi

Aam Admi Party (AAP) Mizoram chuan nimin khan Aizawl Press Club-ah thuthar thehdarhtute kawmin mipuite tana MUHCS kalpui mek chu tha an tih thu leh kalpui zel nise an duh thu sawin, “Amaherawhchu inziahluh hunbi a awm hi awm tawh lo se, hei hian damlo mangangte nasa takin a chhawk zangkhai dawn a ni,” an ti a. “ZPM Party Manifesto Bu, SDRP Chapter 8,sub point-f a an intiam angin inziahluh hun hi engtik lai pawhin hawn ni se kan ti hle a ni,” an ti bawk. Hei bakah hian AAP chuan damlo Zu mamawh tana Red Card siam phalna tura kumtin Rs. 5000 chawi a ngai chu tha an ti lo tih sawiin, “Rs. 5000 lai sen kher ngai lo hian damlo te sawrkar hian Free ngei se kan tih pui a ni,” an ti bawk.

Hei bakah hian AAP chuan Inthlan hmaa a thusawina ah ZPM Leader, tuna kan Chief Minister ni ta in ZPM Chief Minister chuan portfolio a nei ve dawn loh thu leh a Minister-te a enkawl tur thu a sawi laia tunah Portfolio 7 lai a chang leh ta chu mipui bumna niin an sawi a. Mizoram Sawrkar hmasa te'n an la lak ngai loh kawng siamthatna/enkawlna (Road Cess) leh khawtlang hmasawnna ruhrel siamna (Social infrastructure cess) tur chhiah, Petrol leh Diesel atanga lak hmangin Mizoram pum kawng siamtha se, khawtlang hmasawnna ruhrel hi a takin mipui hnen thleng se tiin he sum hi langtlang taka puangzar tura sawrkar an phut thu an sawi a. Kum 2026 Special Intensive Revision ah Chakma tamna khua 23 laia voters 100 percent pung chu dan dik taka pung nge dan dik lo a pung tih enfiah turin sawrkar an phut bawk.