State Disaster Management Authority thutkhawm nei

Nimin khan Chief Minister Lalduhoma hovin State Disaster Management Authority chu CM Conference Hall-ah an thukhawm a, he hun hi National Disaster Management Authority (NDMA) atangin Member, Rita Massal-i chuan a rawn telpui a ni.

He thutkhawm ah hian kum 2021-2025 chhunga khuarel chhiatna avanga Mizoram in thil a hlohte chipchiara chhutna (PDNA) report pek a ni a. PDNA tarlan danin chhiatna thlentu lian zualte chu Cyclone Remal te, African Swine Fever (ASF) te, ruahsur nasa leh leimin nasa te, kum 2025 kum-a hmun thenkhata Sazu puangte an ni a. Hemi hun chhunga Mizoram hloh (total damages) chu cheng vbc. 656.76 niin a chhut a, Economic Loss cheng vbc. 634.35 hu a thlen niin a chhut a. A siam that leh vekna (overall recovery & reconstruction) atan cheng vbc. 879.82 a tul niin a chhut a ni.

Mizoram State Disaster Management Plan 2026 leh District 11 te Disaster Management Plan te sawifiah a ni a. Mizoram sawrkarin Project Management Unit for National Landslide Risk Mitigation Project te, National Earthquake Risk Mitigation Project leh Mitigation Scheme for Forest Fire Risk Management te chu a lo din tawh a. He PMU hi a taka hnathawk thei tura thuamchak chungchang sawi a ni bawk.

Heng bakah hian Emergency Response Support System kalpui chhunzawm zelna tur te, kum 2024 - 25 chhunga District hrang hranga Recovery & Reconstruction Fund atanga hnathawh tur thlanchhuah 178, a vaia cheng vbc. 11.44 senna tur te, Search & Rescue hmanraw lei belhna tur te leh ASF State Specific Disaster-a puan zui zel chungchangte pawh an sawi a. Heng bakah hian Disaster lama Mizoram mamawh hrang hrangte Rita Missal-i hnenah hian an thlen bawk a. Sawrkar mi pawimawh thahnem tak an tel a ni.