Ruihhlo hmanga sumdawngtute hi mipuiten i enliam lo vang u - Chief Minister
June 26-a hman thin ‘International Day Against Drug Abuse and Illicit Trafficking’ pualin nimin khan Aizawl-a Dawrpui Multipurpose Hall-ah ‘International Day against Drug Abuse & Illicit Trafficking’ pualin hun hman a ni a, he hunah hian Chief Minister chuan kum 2024-ah International Day against Drug Abuse & Illicit Trafficking Day chu Vanapa Hall-ah an lo hman tawh thu leh khatihlai vel khan Aizawl kawtthler-ah leh District Capital lamahte chenin ruihhlo ngai, Ngawlvei vak vel hmuh tur an la tam hle rih sawiin, “Sawrkar, tlawmngai pawl leh Kohhran hoten theihtawp kan han chhuah zui a. Supply lam ringawt danchah tum lovin Demand lam tihtawp pawh kan tum a. Security Coordination Committee kan din a, Ruihhlo Do Core Committee kan tinung thar a, Operation kan kalpui a. YMA ten Kumpuan-ah 'Ruihhlo Do' an puang a, Anti-Drugs Squad an kalpui a, chhun zan zawmin hma an la a. Kohhran hrang hrangte thawhpuiah kan sawm a, Kohhran huang chhunga lo sawi tam turin kan ngen a. Zirlai naupangte zingah Awareness kan kalpui a, Media Campaign a kal reng bawk a. Demand Reduction lamah Ngawlvei enkawlna hmun hrang hrangte kan thawhpui a, Hulhhliap Short Stay kan kalpui a. Sethawn Jordan Centre pawh Synod nen kan thawkho tawh a ni,” tiin hetianga sawrkar, tlawmngai pawl leh Kohhran hote pheikhai rual taka an kal avang hian hma an sawn thu a sawi a, “Tunah chuan kan kawtthler velah Ngawlvei tei rawlai hmuh tur an lo tlem ta hle mai. Chhanchhuahna chang a, nunphung pangaia kir leh ta pawh tam tak kan nei tawh a ni,” a ti bawk.
Chief Minister chuan kan chhak lawkah ruihhlo siamchhuahna ram an awm thu leh an rawn tawlhchhuahna hmatawngah kan lo awm si avangin do nasa viau mah ila tihrem vek chu a harsa thei tih sawiin, “Ruihhlo hi kan ban phakah awm reng mah se, ti lo tura kan inven a, kan hnar ngam a ngai,” a ti a. “Mi thiamte sawi danin, ruihhlo laka himna tha ber chu tihchhin loh hi a ni a. Mi tam takin an tichhin a, ‘A ngawl ka vei zui chuang lovang’ ti reng chungin reilote ah a ngawl an vei zui mai thin. Vawiina lo kalkhawm zirlai naupangte leh ka thusawi lo ngaithlatu zawng zawngte hnena ka ngenna chu ‘Ruihhlo chu i ban phakah awm reng mah se, tichhin suh’ tih hi a ni. I nunna chhuhsak tur che a Setana thlemna hmanrua a ni. Mi tam takin an tichhin a, an inrin hman hmain a bawih-ah an lut a, an chhungkua a tichhe vek phawt a, thlanmualah a umlut zui thin,” a ti.
Chief Minister chuan ruihhlo hmanga sumdawngtute chu ‘Mipuiten i enliam lovang u’ tiin, “Midang nunna laksaktu, an chhungkua tichhe vek thei, an thlarau lam thlenga tihlum thei ruihhlo zawrh chingte hi kan enliam mai mai tur a ni lo,” tiin tunhnai ah Mizo nula, Bangkok atanga rawn haw tur Suitcase-ah Heroine an man thu leh an thil zawrh chu mi nunna tichhetu a nih tawh hnuah a ken kualna (trafficking) lamah midangte an la bum duh zel thin tih a sawi a, “Mizote hi thil inthawn mai thin kan lo ni a, kan hmelhriat leh thian thate thil a nih phei chuan han hnarte hi kan lo hreh a. Harsa harsain kan kensak hram hram thin. Chutianga Zo nun ze mawi kan lantirnate chu remchangah lain, chhungkaw bungraw pawimawh anga sawiin an ruihhlo chu midang an kentir ta a. Mi tha tak takin man an tawh phah a, Jail-ah te an lut a ni,” a ti bawk.
Nimin-a he hun hman ah hian Social Welfare Minister Lalrinpuii leh Excise Minister Lalnghinglova Hmar bakah Chief Secretary Khilli Ram Meena leh Central YMA President R. Lalngheta te pawhin thu an sawi a, he huna kalkhawm te hian ruihhlo laka fihlim tur leh ruihhlo do zel turin thutiam an la bawk a ni.