Serchhip Mat Phai leh Bawngchawm tlang-a kawng siam thar Chief Minister in a hawng
Serchhip Mat Phai-a inkalpawhna kawng hrang hrang leh Bawngchawm tlang-a Paragliding Take off panna kawng siam thar hawnna puala inkhawm Bawngchawm tlang-a neih ah hian Bialtu MLA leh Chief Minister Lalduhoma chuan heng kawng hrang hrangte hawn a ni ta chu lawmawm a tih thu sawiin, “Helai hmun hi India ram mai ni lovin, khawvel huapa Paragliding Sports neihna hmunhma tha a tling a. Mizoram tan chuan Pathian thilthlawnpek hmun a ni. A hlutna ang taka kan hman thiam hian min petu Pathian pawh a lawmin a rinawm,” a ti a. He hna thawktu Evergreen Construction & Consultancy ten zawh hun tura bituk a thlen hma kumkhat vel zet la awmah an zo thei chu lawmawm a tih thu sawiin, “Quality tha taka hun tiam zatve a hna thawk zo, PWD ten Letter of Appreciation an hlan awmchhun an ni hial mai thei a. Hetiang Contractor hian chawimawi an phu a ni,” a ti bawk.
Chief Minister chuan heng kawng te hi Paragliding ringawta hisapa siam a ni lo tih sawiin, Mat Phai-a kuthnathawktute tan bakah Bawngchawm tlang-a Livestock Society te tan pawh a tangkai hle dawn tih a sawi a, Paragliding Landing Site chu a zar zotu a nih thu a sawi bawk.
Nimin-a hawn tak Paragliding Take Off hmunhma panna kawng thui zawng hi km 4.70 niin meter 260-a thui laih zauh niin a kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 a ni bawk. A kawng chhuat phah (pavement) hi Granular Sub Base (GSB) 125 mm a chhah phah a nih hnuah Plain Cement Concrete (PCC) chu mm 100-a chhahin M25 grade-a phah vek a ni a. Contractor Agreement Amount chu Rs. 3,45,63,310 a ni.
Hei bakah hian Mat kam Zau-a inkalpawhna kawng thui zawng hi km 11.20 niin a kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 ni bawkin a kawng chhuat phah (pavement) hi Granular Sub Base (GSB) 125mm a chhah phah a nih hnuah Plain Cement Concrete (PCC)-in 100mm-a chhahin M25 grade-a phah vek a ni a. Land Improvement hi hmun hrang hrang – Zawlpui Zau, Lumtui Zau, Lau Zau, Lathei Zau, Zuangleng Zau leh Chhiahtlang Zau te an ni a, Land Improvement thawh zawng zawng zau zawng belhkhawm hi hectare 83.03 niin Contractor Agreement Amount hi Rs. 9,63,30,359 a ni.
Nimin-a heng kawng siam thar hawnna hunah hian PWD Serchhip Division-a Executive Engineer, Er. Zokuma chuan Technical Report pein Serchhip Zawlpui FMC leh Bawngchawm Livestock Society te pawhin thu an sawi bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!