Serchhip District khaw 7-a Integrated Tribal Development Programme kalpui turin hawn a ni
‘Integrated Tribal Development Programme’ hi Advisor to CM (Implementation of Handholding Policy) Dr. KC. Lalmalsawmzauva chuan hawngin Mizoram sawrkarin a kalpui mek Bana kaih chu a thlawna sem tawp nilovin Project base zela hmalak a nih thu a sawi a, “Engtia kalpui nge kan tum tih hi ngun taka ngaihtuah thin tur a ni,” a ti a. Nimin-a kalkhawm kuthnathawktute chu India rama District 802 zinga ziak leh chhiar thiam tamna ber an nih avangin an lakah hian beiseina sang tak an neih thu sawiin, “Sum hi hmasawnna nena kalkawpah kan ngai thin a, sum ngah ringawt hi hmasawnna a ni ber lo a, hmasawnna chu rilru lam thil a ni,” a ti a ni. “Engkim hi taimakna in a hrinchhuah a ni a, keimahni theuhin kan zir a ngai a ni. Progress Partner atana thlangtute kan fair a, a dawngtute pawh in fair kan beisei,” a ti bawk.
ATMA Serchhip District-a Project Director Lalchhuansangi chuan kalkhawmte lawmna thu sawiin, he Project kalpui dan tur tlangpui a sawi a, he Project hi NABARD Tribal Development Fund leh Mizoram CM Bana Kaih Scheme tangkawpa kalpui tur a nih thu sawiin, Implementing Agency chu ATMA Serchhip District a ni dawn a. Project hi kum 6 chhung kalpui tur niin sum sen tur hi Rs. 618,36,000 a ni a, NABARD atangin Rs. 398,14,000 leh Bana Kaih atangin Rs. 93,97,000 ruahman a ni a. Project hmalakna tur atan khaw 7- Hualtu, Hmuntha, Khawbel, Sialsir, Serchhip, Chhiahtlang leh Thenzawl te thlan niin, Thlai chin turin Tung leh Chhawhchhi emaw, Bekang emaw chin kawp tur a ni a, Ser (Lemon) leh Sawhthing emaw Behliang dal (Arhar) emaw chin kawp tur a ni bawk a, Litchi leh Lakhuhthei te chin kawp tur a ni dawn bawk a ni. He project hnuai tanpuina dawng tur hian mi 400 an thlang a. Heng bakah hian Handloom and Tailoring Sector awm bawkin, hetah hian mi 100 thlan an ni bawk.
He hunah hian Serchhip Bawrhsap Paul L. Khuma pawhin Integrated Tribal Development Programme avang hian kuthnathawktute tharchhuah chu lo pung se a tih thu sawiin, hlawhtlinna sawi tham nei theuh turin he hmalakna in a huam te chu duhsakna a hlan a. Department hotute pawhin an beneficiary te an hnathawhna hmunah enpui fo thin tura chahin, chu chuan rah tha a chhuah ngei a beiseia thu a sawi bawk.
NABARD-a Deputy General Manager Lalrokunga Chhakchhuak pawhin Serchhip a kuthnathawktute chu he Project ah an lo lut ta sa sa a, hlawhtling ngei tura theihtawp chhuah turin a sawm a. Taimakna lo chuan hlawhtlinna a awm lo tih sawiin, he Project a hlawhtlin nan chuan an zavaia an tanrual a ngai dawn tih a sawi a. “Beneficiary ten mahni tan chauh ni lo, kan ram tan theihtawp I chhuah ang u,” tiin a sawm a ni.
Agriculture & Farmers’ Welfare Department-a Director Vanramthangi pawhin he hmalakna ah hian sawrkar chu theihtawpin a tang tih sawiin, Beneficiary te pawh theihtawp lo chhuah ve turin a sawm a. Harsatna an nei a nih chuan tanpui turin Department lam an inring reng tih sawiin, Sawrkar hnathawh aiin kuthnathawh hi a hlawk zawk a ni tih thangtharten an lo hriat theih nan theihtawp chhuah turin a chah a, ram leilung tha tak Pathianin min pek hi hmang tangkai a, a rah sengtu ni theuh turin he huna kalkhawmte chu duhsakna a hlan bawk a ni.
Nimin-a he hun hman hi ATMA Serchhip District-a Deputy Project Director Gregory Malsawmkima chuan kaihruaiin sawrkar Department hotute bakah he Project hnuaia khaw hrang hrang atanga tanpuina dawng turte an tel a ni.