Serchhip District-a hri danna pek beihpui thlakna kalpui dan tur sawihona neih a ni
Serchhip DC Meeting Hall-a District Task Force Committee on Immunization thutkhawm hi Addl. DC Dorothy Muansangi chuan kaihruaiin tunlaia India thenawm Pakistan leh a chhehvela Zeng hri (Polio) la leng mek laka lo invenna tura July 1 atanga 3, 2026 chhunga Vaccination/Immunization kalpui dan tur te, Chhul Hmawr Cancer venna HPV Vaccine chungchang te, Routine Immunization leh Serchhip District dinhmun hrang hrangte thlirletna leh tunhnaia Mizoram thenawm Bangladesh rama Sentut/Sentet (Measles/Rubela) hri leng mek chungchang leh invenna (vaccine) lak a pawimawhzia te, mipuite him nan uar lehzuala hri danna lak a nih theih nana thawhhona tha lehzual a awm theih dan turte sawiho a ni a. Thutkhawm kaihruaitu Addl. DC Dorothy Muansangi chuan heng hri danna (vaccine) pawimawh tak takte hi a latu turte’n tha taka an lak a, mi tumah pek hmaih an nih lohna turin sawrkar Department-te leh khawtlang hruaitu leh mipui zawng zawngte tanrual a pawimawh thu sawiin, thawhhona tha tak nei turin Serchhip District mipuite a sawm a ni.
He thutkhawm ah hian Serchhip Chief Medical Officer (CMO) Dr. Lallawmpuii chuan tunlaiin India thenawm Pakistan leh a chhehvelahte Zeng hri (Polio) a len nasat thu sawiin, he hri hi India ramah umbo lo ni tawh mah se, darh leh thei a nih avang leh he hri laka kan fihlim (free) reng theih nan Universal Immunization Programme (UIP) hnuaiah July ni 1 atanga 3, 2026 chhungin Serchhip District hmun hrang hrangah ngawrh taka Zeng hri danna pek beihpui kalpui leh tur a nih thu a sawi a. India ramah Chhul Hmawr Cancer a hluar thu sawiin, HPV Vaccine lak pawimawhzia leh Chhul Hmawr Cancer avang hian India ramah minute khat tlinglo chhunga mi pakhat thi ziah ang an nih thu a sawi bawk a. Private Hospital-ah HPV Vaccine lak nan cheng sang thum atanga singkhat bawr velte insen ngai thin chu UIP programme hnuaiah naupang kum 14 pum tawh, kum 15 la tling lote tan a thlawna lak theih a nih thu a sawi bawk.
Serchhip-a Deputy Chief Medical Officer Dy. CMO) Dr. Lallawmkimi Chhakchhuak pawhin Serchhip District-a Polio Vaccine inpek dan tur, Intensified Pulse Polio Immunization (IPPI) kalpui dan tur hrang hrangte sawiin, July ni 1-ah hmun hrang hrangah Vaccine pekna tur hmun siam tur niin chung hmun ruatah te chuan nausen (0-59 months) te chu an chhungte’n hruaiin Oral Polio Vaccine eitir tur an nih thu a sawi a. July ni 2 leh 3-ah In tin tlawh kualin Polio Vaccine pek beihpui thlakna neih tur a nih thu a sawi bawk. Heng bakah hian tunlaia Bangladesh-a Sentut hri leng mek avanga mipuite fimkhur a ngaih thu sawiin, Routine Immunization ngaih pawimawh a tul thu leh Serchhip District dinhmunte a tarlang bawk.