Mizoram Synod kutah Govt. Aizawl College Building hlan

Aizawl Sikulpuikawn-a Govt. Aizawl College (GAC) Building chu Mizoram Presbyterian Church (Synod) kutah hlan a ni dawn ta a, hemi atan hian Higher & Technical Education Department leh Mizoram Presbyterian Church (Synod) te chuan nimin khan inhlanna thuthlung ‘Deed of Agreement’ an ziakfel.
Planning & Programme Implementation (P&PI) Department Committee Room-a ‘Deed of Agreement’ ziahna hun hi Higher & Technical Education Department changtu Commissioner & Secretary Dr. Lalrozama chuan kaihruaiin H&TE Director Laltanpuia chuan report a pe a, inremna ah hian Mizoram sawrkar aiawhin H&TE Commissioner & Secretary Dr. Lalrozama chuan hming ziakin, Mizoram Synod aiawhin Moderator Rev. John Raldosanga chuan hming a ziak bawk a. Inremna hriatpuitu atan Mizoram sawrkar aiawhin H&TE Joint Secretary K. Lalhmangaihzuala leh H&TE Director Laltanpuia chuan hming an ziah bakah Mizoram Synod aiawhin Synod Secretary Rev. B. Zohmangaiha leh Sr. Executive Secretary Rev. VL Luaia Hranleh chuan hming an ziak bawk a ni.

Aizawl College hi August ni 25, 1975 khan din a ni a, Building nei mumal lovin hmun hrang hranga Class neih a nih hnuah Sikulpuikawn-a Sikulpui leh Sikulsen-te chu Sawrkar kuta a awm laiin a compound-ah Govt. Aizawl College building sak a ni a. Kum 2010 Synod Inkhawmpui Agenda General 33-in a rel anga Sikulsen (Govt. Boys' Primary School) leh Sikulpui (Govt. Boys' Middle School) te sawrkar kut atanga lalet leh tura hmalakna kal zelah May ni 29, 2019 khan Sawrkar chuan Mizoram Synod kutah a hlanlet a. February ni 26, 2018 khan Mualpui-ah Govt. Aizawl College Campus thar tur chu hawngin tunah hian a tam zawk insawn tawh a. He building hi Mizoram Synod chuan December ni 10, 2024 khan zirna leh a kaihhnawih hrang hrang atana hman tangkai a nih theih nan Sawrkarah lehkha a thehlut leh a ni.

Kumin January ni 7 khan H&TE Minister Dr. Vanlalthlana kaihhruaina hnuaiah Building inhlan chungchang hi ngaihtuah ho a lo ni tawh a. Draft Agreement buatsaihtu tur Drafting Committee din niin, Draft Agreement (Final Draft) hi March ni 23, 2026 khan peihfel a ni a. Law Department leh Finance Department a\angin pawmpuina lak a nih hnuah nimin khan hming ziah hnan a ni a. He Inremna ah hian Mizoram Synod chuan building hlut zawng (depreciated value), sawrkar dan ding lai anga chhut chhuah sa Rs.3,18,92,300/- chu Mizoram sawrkar (H&TE Department)-ah chhung lutin, pawisa a chhunluh ni a\ang hian Government Aizawl College Building, Sikulpuikawn ami neitu nihna chu Mizoram Presbyterian Church kutah a awm nghal dawn a ni.