Serchhip-ah Chief Minister in District Plan & Project Monitoring System a tlangzarh

Serchhip Bialtu MLA leh Chief Minister Lalduhoma chuan nimin khan ‘Serchhip District Plan & Project Monitoring System’ a tlangzarh a, Mizoram chu Digital State-a siam a duh thu sawiin, ziak leh chhiar thiam tamna kan nih avangin thil harsa nia a hriat loh thu a sawi nghal bawk.
Serchhip Bawrhsap Pisa leh NIC ten an siam Serchhip District Plan & Project Monitoring System tlangzarhna hun Serchhip DC Meeting Hall-a neih ah hian Chief Minister Lalduhoma chuan nikum June ni 18 khan Serchhip DC leh NIC-te tangkawpin an siam, ‘Vantlang Viltu’ (Citizen’s Eye) chu hawn a nih thu leh tunah District Plan & Project Monitoring System tlangzarh a ni leh ta chu a ngaihtuah chhuaktu DC leh a thawhpuite chungah lawmthu a sawi a. He System thar hian Serchhip District hmasawnna tura thawhhona a tichak dawn tih sawiin, “Data tharlam ber ber kan nei reng thei dawn a. Kan tangkaipui hle ang,” a ti a. “Sawrkar hian Convergence kan uar a, kan rawn tihbelh chho zel dawn a. DC kaihhruaina hnuaiah inhretawn vekin kal ula a, DC pawh hi thunei takin awm se kan duh a. An hmuh phak loh emaw, an hriat loha Department thenkhat ten hna in lo thawhte hi tha kan ti tehchiam lo. Inhriatsak tawn zela hmalakna hian Project inthuah tur a titlem a, sum leh pai, hun leh tha kan save zawk a ni,” a ti.

Digital Service hian sawrkar hnathawkte leh mipuite tan awlsamna a siam thu Chief Minister chuan sawiin, “Ka mimal duhdanah phei chuan, Mizoram hi Digital State-a siam ka duh a. Mipui kan la tlem a, ziak leh chhiar thiam kan tam a, Digital State nih hi chuti taka harsa niin ka ring lo. Department zawng zawng hian mipuiten an va dawr theihna chi, an Business theuh kha Digital Platform siam vek se, Digital State kan ni titih der a ni mai,” a ti bawk.

District Plan & Project Monitoring System tlangzarhna hun hi Serchhip Bawrhsap Paul L. Khuma chuan kaihruaiin he hmalakna hi State Collaboration Initiatives hnuaia DARPC funded project-a kalpui a ni tih sawiin, Serchhip DC Office-a SDC, R. Vanthangpuia chuan he Project nihphung leh a hman tangkai dan te a tarlang bawk a ni. He hunah hian Serchhip-a Department hrang hrang hotute leh tlawmngai pawl hruaitute bakah thuthar thehdarhtute an tel a ni.