Sawhthing leina man chhunluh hlan let leh

Mizoram Agriculture Marketing Board (MAMB) chuan nimin khan Mualkawi Secondary Collection Centre (SCC) te hnenah Minimum Support Price aia sanga Sawhthing hralhna man tlingkhawm Rs. 1,99,833 hlanletna hun an hmang.

Agriculture & Farmers’ Welfare Minister PC. Vanlalruata hova a Pisa-a he hun hman ah hian Minister chuan Mualkawi SCC ten farmer te tana rinawm taka hma an lo lak dan chu a lawmawm takzet tih sawiin, midang tana entawntlak an nih thu a sawi a. Sawrkarah an hlawkna te chhunlet nachang an hria chu ropui a tih thu sawiin, anni anga rinawm taka farmer te tana hma la tur hi ramin a mamawh tih a sawi a, MAMB anga lawmthu sawina ni pahfawmin, an SCC chuan Godown thuamthat kawngah leh mamawhna hrang hrang an neih atana an hman theih nan pawisa chu hlanlet an nih thu a sawi bawk.

Mualkawi SCC hian Primary Society 8 - Mualkawi, Zokhawthar, Kelkang, Dilkawn, New Hruaikawn, Hruaikawn leh Buhfekzawl huamin kum 2026 chhung hian sawrkar flagship programme kaltlangin an Bial chhunga farmer te Sawhthing tharchhuah chu Auction kaltlangin an hralh a. Sawrkarin Minimum Support Price (MSP) Rs. 50 per kg a ruat aia sangin Sawhthing hi an hralh thei a, an hralhna rate sang ber chu Rs. 59 per kg niin MSP aia sanga an hralhna pawisa tlingkhawm chu Rs. 1,99,883/- a ni a, he pawisa tlingkhawm hi MAMB-ah Mualkawi SCC chuan an chhunglut a. An pawisa chhunluh ang ang chu MAMB hian a hlanlet leh a ni

Sawrkar thuchhuah tarlan danin kumin hian Mizoram-a SCC 23 te chuan Sawhthing hi kg-ah Rs. 50 leh a aia sangin an hralh a, Sawhthing lei zawng zawng chu quintal 186693.66 a ni.