Ralthuam siamchhuah lama State tinte hmachhawp chungchang zirhona neih a ni

Mizoram sawrkar-a Department of Commerce, Industries, Geology & Mining Department buatsaihin nimin khan ralthuam siamchhuaha India ram intodelh thei tura State tinte hmachhawp, ‘Atmanirbharata in Defence Manufacturing - Promoting States Ecosystem’ tih thupui hmangin Workshop neih a ni.

Planning & Programme Implementation Department Conference Hall-a he Workshop hi Commerce & Industries Additional Director Lalhmunsiama chuan kaihruaiin Mizoram-ah a vawikhatna atan hetiang zirhona buatsaih theih a ni chu lawmawm a tih thu a sawi a, Mizoram chu State dangte nena khaikhin chuan ralthuam siamchhuah mang a la awm lova, mahse tlem tal pawh a thawh theih chuan India ramin mahni intodelh a tumna kawngah a hlawhtlin puih ngei a rin thu a sawi a. August thla a National Level Summit neih tur atan he zirhona hi buatsaih a nih thu a sawi bawk a ni.

He hunah hian Department of Defence Production, Ministry of Defence, Government of India a Joint Director Ajit Dubey chuan hmarchhak State-te leh ramri hrula awm State-te tana he zirhona pawimawhna leh hmabak te a sawi bakah Department of Defence Production hmalakna pawh a sawifiah bawk a. Commerce & Industries Department Deputy Director Ronald Lalchhuanawma chuan Bharat Audyogik Vikas Yojna Scheme (BHAVYA) chungchang sawifiahin, BHAVYA in a tum ber chu industry park 100 siam a ni a, Industry din dawna harsatna awm thin - ram lei, eng awm tha lo leh thil tihman sang te ti ziaawm tur atana duan a nih thu te a sawi bawk.