Rajya Sabha MP thlanna a MNF Candidate puang

Tun thla ni 18-a Mizoram Rajya Sabha MP thlanna neih turah MNF Party chuan Zothansangi Hmar chu an Candidate dawn a, nimin khan he inthlan chuh tur hian a hming a pelut nghal a ni.
MNF Party hian nimin khan Aizawl-a Mizo Hnam Run Chhung Inkhawm ah Rajya Sabha MP thlan-a an Party Candidate tur hi puangin MNF Sr. Vice President Dr. R. Lalthangliana chuan Zothansangi Hmar D/o Rualkhuma Hmar, College Veng, Aizawl chu an Candidate tur a nih thu a puang a. “Vawiin-a kan Candidate hi thalai viak tha tak, Zofate zinga chhuanawm tak a ni a, thiamna lamah pawh theuneu lo tak a ni. MNF-ah kum naupang zawk leh thalaite tan hmun zau tak a awm a, Hmeichhiate hi Rajya Sabha MP Candidate-ah a ruat hmasa ber party kan ni a, Hmeichhiate hian MNF-ah hmun pawimawh tak an luah thei a ni tih a lantir a, duhsakna sang ber kan hlan a ni, a ti,” a ti.

Candidate tura puan Zothansangi Hmar pawhin MNF-in ram tana hma a lo lak tawh leh hmachhawp te chhunzawm ve theihna kawng zawh tura MP (Rajya Sabha) Candidate atan ruat a ni chu phu lo a intih thu leh lawmawm a tih thu sawiin, MNF candidate mai ni lo, Mizo hmeichhiate aiawha ding leh Mizo mipui aiawha ding a nih thu a sawi a. “Ukil ka nihna angin Dan hi miretheite tanpui nan, dikna humhim nan hman theih a ni tih ka hria a, hemi kawngah hian theihtawp ka chhuah ang,” a ti bawk.

MNF Party in Rajya Sabha MP thlanna-a Candidate tura an puan Zothansangi Hmar hian nimin vek khan Nomination a file nghal a, MLA 4 ten Signature pe-a rawtna siamin, MNF Party MLA leh Party hruaitu engemawzatin an ttawiawm a ni.