Hna laka buaina awm fo tha an tih loh thu MSU in an thlen

Mizo Students’ Union (MSU) General Hqrs. chuan Mizoram Public Service Commission (MPSC) inthlahdah avanga Sawrkar hnalak ah buaina a awm fo chu tha an tih loh thu an sawi.

MSU General Hqrs. hruaitute hian nimin khan Chief Minister Lalduhoma chu a Pisa-ah kawmin MPSC hna lakah thil tihsual awm thin chungchang sawipuiin, tunhnaia Jr. Grade of Legal Service hna lakah buaina thar a awm leh chu pawi an tih thu an thlen a. “Mizoram-a hna lakna kan neih chhun leh Group ‘A’ Officer thlenga post sang zawk latu MPSC berin tihsual an nei ta fo hi ngaihzam a har,” tiin an ngaih thutak viau tih an sawi a, MPSC Chairman chuan a hnuaia hnathawk te a vil tha tawk lo ah an ngaih vangin bang ngam tura thurawn pe turin an ngen tih an sawi bawk.

Hei bakah hian MSU chuan Hnamdang (Vai) in Mizo hminga Official document atana hming a thlak chungchang pawh Chief Minister hi sawipuiin, htia hnamdangin Mizo hminga hming an thlak fo chuan ILP exempt tumna leh Tribal Certificate neih tumna tha lo tak a hrinchhuah theih avangin tihtawp anih theih nana hma laksak turin an ngen a. Hemi bakah hian BSF a Mizoram Quata hnawhkhat tura Document diklo siamtu mi pariat te tun thlenga man chhuah an la nih loh chungchang pawh thlenin, a ranglama hma lak sak turin an ngen a. MSU te thu thlen chu pawimawh a tih thu Chief Minister chuan sawiin, theihtawpa a lo bawhzui sak tur thu a sawi a ni.