Polling Station thar 52 siam belh a ni dawn

Electoral Roll Special Intensive Revision (SIR) 2026 kal mekah Mizoram-ah Polling Station thar 52 siam a ni dawn.

Election Commission of India (ECI)-in SIR kalpui dan tur a duan lawk dan chuan May ni 30 leh June ni 28 inkar chhung hian Booth Level Officer (BLO) te’n an Bial chhunga In tin tlawhin Enumeration Form sem leh lakkhawm hna an thawk anga, nimin June ni 28 kha Polling Station siamrem ni atana hman turin a ruahman bawk a. Tun dinhmuna hriat theih chinah Polling Station thar 52 siam belh tura ruahman a nih avangin Mizoram-ah Polling Station 1,301 awm thin kha Polling Station 1,353 a awm tawh dawn a. ECI duhdan angin Polling Station hi vote neite awmna atanga kilometre 2 aia hla ke a kal ngai lo tura dah tur a ni a. Polling Station tina vote awm zat hi 1,200 aia tam lo tura ruahman a ni ta bawk a. Heng Polling Station thar te hi Vawiin lamah chuan hriatchian theih tawh tura beisei a ni.

Tarlan tawh angin Electoral Roll Special Intensive Revision (SIR) kal mekah Mizoram-ah Enumeration Form Digitise hna zawhfel a ni tawh a SIR thawh thumna a State zo hmasa ber a ni. Mizoram chhunga Booth Level Officer (BLO) 1,301-te chuan May ni 30 atang khan Special Intensive Revision (SIR) 2026 atana Election Commission of India (ECI) thupek angin vote neite inziahluhna tur lehkha sem chhuah, laklet leh digitise hna hi ngawrh takin an thawk a. June ni 28-a zawhfel tura ECI hun biktuk hma ni 3, kar kalta Ningani tlai khan digitisation hi zawhfel vek a ni a, SIR thawh thumna kalpuitu State 16 leh UT 3-te zingah Mizoram hian digitsation hi a zo hmasa ber a. Thla thar July 4 khian Draft Electoral Roll tarchhuah a ni ang.