PHE Minister in hnathawh a en

PHE Minister Prof Lalnilawma chuan Inrinni zan khan AMRUT 2.0 hnuaia Septic Tank thli mumal taka kal tirna tur PHE project kalpui mek, ‘Sewerage & Septage Treatment Works for Zone-7, Aizawl City Small Bore Sewer, Tuikual Lui’ chu a hmunah a tlawh a. Aizawl khawpui chep takah Septic Tank thli luanralna tur soakpit nei tha lo leh nei mumal lo an tam avangin vantlang tui luankawr a luantir ta mai mi tam tak an awm avangin mumal taka kaltirna tur leh mipui hrisel zawknan he hmalakna hi kalpui a ni. He Project hi Rs. 37,76,85,198 senga thawh zawh tur niin August ni 5, 2026-a thawh zawh tura ruahman a ni a, he Project hnuaia Pipe phum tur hi km 31.41 a thui niin, tun dinhmunah km 8.6-a thui phum a ni tawh a ni. He ruahmanna ah hian Septic Tank atanga thli lakkhawm chu sawrkar ram, MINECO-ah a tihthianghlimna hmun, Sewage Treatment Plant (STP)-a sawngbawl tur a ni a, heta thli tihfim tawh hnu hi leitha leh thildangah tangkai taka hman leh theih tur a ni a, nikhatah ek thli million litres 3.5 a tithianghlim thei dawn a ni.