NGOCC in Damdawi In sak mek PGCIL-ah an thlen
Tunhnaia Serchhip NGO Coordination Committee thukhawm chuan Serchhip-a District Hospital sak hna thawh mek chungchang hi sawihoin, damdawi In sak hna hi thawh zawh thuai a nih theihna turin a tul angin PGCIL hnenah hotute hmuh an rel a. Hemi ang hian nimin khan NGOCC Secretary Laldinpuia chu Guwahati-a PGCIL Hqrs. ah kalin PGCIL Executive Director/Chief General Manager (NER) hnenah khum 100 awm theihna tur Serchhip damdawi In sak hna thawh mek chu chak zawka chhunzawm a nih theihna tura ngenna lehkha hi a thehlut a, he lehkha ah hian Serchhip NGO Coordination Committee a tel pawl hrang hrang President ten hming an ziak a ni.
Serchhip NGOCC Secretary Laldinpuia chuan PGCIL hotute hian an lehkha thehluh hi tha taka an lo dawnsawn thu sawiin, damdawi In sak mek avanga khum indaihlohna leh mipuite harsatna tawh te an thlen thu a sawi a. PGCIL hotute pawhin mipuite harsatna chu an hriatthiam thu leh tuna damdawi In sak hna thawh mek chu Estimate tih that ngaiin File a kal mek thu bakah Delhi-a an Office lam pawmpuina a ngaih avangin tih zung zung theih a nih loh thu leh hun ala duh deuh tur thu an sawi a, damdawi In sak hna hi chhunzawm thuai tura hmalak mek a nih thu an lo sawi thu a sawi bawk.