MUCO Bank Ltd. Annual General Meeting neih a ni

Mizoram Urban Cooperative (MUCO) Bank Ltd. chuan nimin khan Annual General Meeting neiin he hun hi Cooperation Department changtu Minister P.C Vanlalruata chuan khuallian niin a hmanpui a ni.

Aijal Club RB McCabe Hall-a MUCO Bank Ltd. Annual General Meeting-ah hian Cooperation Minister chuan sawrkarin kuthnathawktute ngai pawimawh zawnga tan a lak zel thu sawiin, kumin ah pawh Sawhthing leina atan sawrkarin cheng nuai tam tak thingtlang lama a pekchhuah thu a sawi a, chung kuthnathawktute chuan an sum dahthatna tur atan Bank an mamawh zel bawk tih a sawi a. Chung atan chuan MUCO Bank Ltd. chuan chanvo pawimawh tak an chelh thu leh hun lo la kal zel turah pawh Mizoram in hma a sawn zelna atan mawhphurhna an neih thu a sawi a ni.

Cooperation Minister chuan sawrkarin Kolasib, Mamit, Lunglei leh Lawngtlai District kaltlang Oil Palm Link Road thuamchakna atan PWD kaltlangin cheng vbc. 25.97 lai Tender an chhuah tawh thu sawiin, sawrkar laipui Scheme National Mission on Edible Oils – Oil Palm (NMEO-OP) zulzuia Oil Palm chingtute tan tan a lakpui zel thu a sawi a, India ram State dangte lakah Mizoram chuan Tung tam tham zawk leh hlawk zawk tharchhuahna tur hmunhma remchang bik a neih thu leh hei hi hmang tangkaiin Mizoram sawrkar chuan National Mission on Edible Oil - Oil Seeds/Tree Borne Oilseeds Scheme hnuaiah Tung chin hi a ngaih pawimawh thu a sawi bawk. Hei bakah hian Minister chuan MUCO Bank chu an kal zelna turah duhsakna hlanin, loan cheng nuai 3948.77 lai an pe chhuak thei chu hma an sawnzia tilangtu a nih thu a sawi a, kumin February thla a Bawngkawn Branch thar an hawng thei te chu a lawmpui thu sawi bawkin, MUCO Bank than zelna turin duhsakna a hlan bawk.

MUCO Bank Ltd. Annual General Meeting hi an Chairman R. Liantluanga chuan kaihruaiin Secretary H. Ramherliana chuan Member 15 thite sunna hun a hmang a. CEO Vanlalhuma chuan Annual Report pein MUCO Bank Ltd. hi August ni 11, 1988-a din a ni a, tun dinhmunah hian deposit cheng nuai 8150.75 awm tawhin, loan cheng nuai 3948.77 pekchhuah a ni tawh a, loan chhia, NPA loan cheng nuai 218.95 an nei mek a. Shareholder mi 5664 awmin Share cheng nuai 543.56 an nei mek a ni.