Mizoram Secretariat-ah PALNA Anganwadi-cum-Crèche hawn a ni

Social Welfare & Women and Child Development Minister Lalrinpuii chuan nimin khan Mizoram Secretariat, MINECO-ah ‘PALNA Anganwadi-cum-Crèche’ a hawng.

PALNA Anganwadi-cum-Crèche hi kum 2022 khan Ministry of Women & Child Development (MoWCD) chuan Mission Shakti (Women Empowerment) hnuaia hna-thawktu hmeichhiate tana a rawn duan thar a ni a, The Maternity Benefit Act, 2017 angin hnathawktu mi 50 aia tam awmna hmunah Crèche Facility neih ngei tur a nih angin MoWCD Operational Guidelines zulzuiin he hmun hi kalpui a ni dawn a. He hmun hi naupang kum 6 hnuailam enkawlna tura duan niin, Anganwadi hnai ber nena thlunzawm a nih angin naupangten Nutrition, Health Check-up leh chawtha te an dawng thei vek dawn a ni.

Nimin-a PALNA Anganwadi-cum-Crèch hawnna hunah hian Social Welfare & Women and Child Development Minister Lalrinpuii chuan Secretariat-a hnathawktu nu leh pa, a bik takin hmeichhe hnathawk ten rilru ngaihngam tak leh hna leh chhungkaw enkawl kawp dan tha zawk nei chunga sawrkar hna an thawh theih nan he hmun hi siam a nih thu a sawi a. Kum 6 hnuailam naupangte chu an taksa leh rilru nasa taka a than lai a nih avangin uluk taka enkawl an ngai tih sawiin, he Crèche kaltlang hian naupangte hriselna, ei leh in, leh an hmasawnna kawng hrang hrang chhinchhiah zui zel a nih tur thu a sawi a. He hmun hian nu hnathawktute phurrit a chhawk ngei a rin thu sawiin, Crèche-a thawktu zawng zawngte chu theihtawp chhuah turin a chah a ni.

Minister Lalrinpuii chuan he hmalakna hlawhtlin nana thawktute chungah lawmthu sawiin, he Crèche hi Mizoram chhunga Department dangte tan pawh entawn tlak a nih a beisei thu a sawi a. Ram hmasawnna tak tak thleng tur chuan naupang leh hmeichhiate dinhmun chawikan leh ngaihsak thiam a pawimawh thu a sawi bawk.

PALNA Anganwadi-cum-Crèche hawnna hun hi SWW&CD Department Commissioner & Secretary Lalzarmawii chuan kaihruaiin WCD Director Zoramthangi Chhangte chuan PALNA Anganwadi-cum-Crèche chungchang a sawi bawk a. Secretariat PALNA Crèche hi enkawltu hran Management Committee siam a nih thu a sawi bawk.