Mizoram-a JJM kalpui dan thlirhona neih a ni

Nimin khan Chief Secretary Khilli Ram Meena kaihhruaiin State Water and Sanitation Mission Apex Committee chu an thukhawm a, Jal Jeevan Mission (JJM) hnuaia hmalakna te thlirho a ni.

Chief Secretary Conference Hall-a State Water and Sanitation Mission Apex Committee thutkhawm ah hian National Jal Jeevan Mission Joint Secretary D. Senthil Pandiyan leh Swati Meena Naik-i te pawh biakhmuhtheihna hmanga rawn telin sawrkar laipui scheme Jal Jeevan Mission (JJM) hnuaia Mizoram-a hnathawh kal mekte leh JJM 2.0 hnuaia an hmachhawp te an sawiho a. JJM-a Joint Secretary Senthil Pandiyan chuan thutkhawma tel te hnenah JJM 2.0 thiltum leh nihphungte a hrilhfiah a. JJM 2.0 hian thil hlu siam (asset creation) chauh ni lovin, a tlona te, a rintlakna te, hnathawh turte hun taka zawh thin te, inrelbawlna siamthat (governance reforms) te leh mipuite tel vena (public participation)te a tum zawk thu a sawi a. Chief Secretary Khilli Ram Meena pawhin JJM 2.0 Scheme a hlawhtlin theih nan Department hrang hrangte thawhhona tha a pawimawh thu a sawi bawk.

Jal Jeevan Mission (JJM) chu December 2028 thleng pawhsei a nih tak avangin Mizoram sawrkar leh Ministry of Jal Shakti, Department of Drinking Water & Sanitation te chuan May ni 6, 2026 khan Jal Jeevan Mission 2.0 kalpuina tura inremna thuthlung (Memorandum of Understanding) an ziak a. Mizoram-a JJM 2.0 Scheme kalpui nana Comprehensive Implementation and Reform Plan (CIRP) chu nimin-a thutkhawmah hian pawm a ni a. He thutkhawm ah hian sawrkar mi pawimawh te an tel bawk a ni.