Lok Kalyan Mela neih mek a ni

Urban Development & Poverty Alleviation (UD&PA) Department chuan PM-SVANidhi Scheme kum 6-na pualin tun thla ni 10 atang khan Dawrpui Multipurpose Committee Hall-ah ‘Lok Kalyan Mela’ an buatsaih a; PM-SVANidhi Scheme kaltlang hian Mizoram-ah kawtthlera dawrkai (Street Vendor) 4425 hnenah loan pek a ni tawh a ni.

UDPA hotute chuan tun thla chhung hian PM-SVANidhi kum 6 tlin lawm nan Lok Kalyan Mela an neih mek thu leh tun thla ni 23 khian Street Vendor-te pual liau liuain intihhlimna leh chawimawina semna hun neih a nih dawn thu an sawi a; Mizoram pumah June 2020 atanga PM-SVANidhi Scheme kalpui a nih hnuah he Scheme kaltlang hian Loan hmu Street Vendor 4425 an awm tawh thu an sawi a, heng mite hnenah hian loan  cheng vbc 7.33 pek a ni tawh a ni.

Street Vendor zinga Loan dil thar duh tan dilna hun hawn reng a nih thu UD&PA hotute chuan an sawi a, tuna an thlurbing deuh bik chu Loan la tawhte thlalak sak leh Socio-Economic profiling tihsak te, Loan vawi 2-na thleng rul zo tawhte tana PM-SVANidhi Credit Card siamsak te, Social SeSurity scheme thlan bika thlunzawm theihte thunzawm leh Digital on boarding (UPI etc) tihsakte a nih thu an sawi bawk.

Lok Kalyan Mela-ah hian Vawiin hian Mizoram Building & Other Construction Workers' Welfare Board hnuaia inziaklut kawppui te scheme nena thunzawm te, Profiling leh Loan Camp-te an nei dawn a. Tun thla ni 18 khian PM-SVANidhi loan la tawh zinga Street Food Vendor-te tan Food Safety Training neih tur niin Training-a telte hnenah hian Certificate pawh an pe dawn a ni. PM-SVANidhi Scheme hi District tinah kalpui a ni a; Mela zawh hnuah pawh Loan dil duhte chuan UD&PA Directorate leh District tina UD&PA Office-ah te ngaihven theih a ni.