Kawngpui himna tur thupek zawm vek turin hriattir

Mizoram sawrkar chuan Mizoram chhunga National Highway zawng zawngah kawngpui himna tura thupek siam chu zawm vek turin a hriattir.

Supreme Court in Suo Moto Writ Petition (Civil) No. 9 of 2025-a thuchhuak a siam bawhzui leh 'The Control of National Highways (Land & Traffic) Act 2002' leh 'Gazette of India Extraordinary 2019' in thuneihna a pek angin Public Works Department-a Commissioner & Secretary leh Highway Administrator/Authority ni bawk chuan Mizoram chhunga National Highway zawng zawngah he thupek hi zawm tura hriattirin, Lirthei lian (Heavy vehicles) emaw, sumdawnna lirthei (commercial vehicles) reng reng National Highway kawngpuiah leh a sirah (paved shoulder) te  Parking emaw, din emaw khap tlat a ni tih tarlangin, an din theihna tura ruat bik hmun (designated bay, lay-bye emaw wayside amenity)-ah chauh an ding/chawl tur a ni tih a tarlang a. National Highway kawng huamchhung  ah Dhaba thar, chaw ei dawr emaw sumdawnna hmun/In (commercial structure) reng reng sak thar emaw, siam thar emaw chu tun atang hian khap nghal a nih thu a tarlang bawk.

Heng bakah hian PWD atanga phalna hmu hmasa lovin Department leh tualchhung thuneitu (local body) ten Highway Safety Zone (kawngpui himna atana huamchin) chhunga hmun/hmunhma reng reng atan license thar, No Objection Certificate (NOC) emaw, sumdawn phalna an pechhuak tur a ni lo tih tarlangin, a hlui pawh an renew sak tur a ni lo tih a tarlang a. National Highway tlan tlangna District tinah Deputy Commissioner/District Magistrate ten District Highway Safety Task Force an din tur a nih thu bakah State Police leh Transport Department thawktute tangkawpin National Highway viltu tur bik, Dedicated Highway Surveillance Teams siamin uluk takin kawngpui hi an fangkual (patrol) thin tur a ni tih a tarlang a, heng Duty fangkual lirtheite inkar hlat zawng hi km 50 aia hla a ni tur a ni lo tih a tarlang bawk.