Kawng siam hna thawh mek chawlh tir rih an ni

Serchhip khawpui chhung kawngpui siam hna thawh mek chu duh anga hnathawh a nih loh avangin khawl dang an chhawp belh hma chu an hnathawh chhunzawm tawh lo turin thawktute hriattir an ni.
Serchhip khawpui chhung paltlangtu kawngpui hi Mizoram PWD enkawlna hnuaiah kar kalta atang khan hnathawk tura thlan Urban Infra Project Ltd. ten Blacktop hna hi an thawk tan a, PWD a thawktu ten an hnathawh hi an enfiah hnuah an hnathawh chu a tha tawk lo nia hriat a nih avangin kawng chhuat chil mamna khawl, Pneumatic Roller an chhawp theih hma chuan hna hi chhunzawm tawh lo turin ni hnih chhung hna an thawh hnuah an hnathawh hi an chawlhtir zui ta a ni.

He hna thawktu Urban Infra Project Ltd. chuan he khawl an hman thin chu a chhe rih nia an sawi avangin kawng siam hna hi an thawh tan leh hun tur erawh hriat mai theih a ni rih lo a. Hetihlai hian kawngpui dung-a Side Drain siam hna erawh hmun hrang hrangah ngawrh taka kalpui chhunzawm mek a ni thung.