IPRP&S Minister in Khawzawl-ah DIPRO Office hawngin Champhai Press Club a tlawh bawk

Information, Public Relations, Printing & Stationery (IPRP&S) Department changtu Minister B. Lalchhanzova chuan nimin khan Khawzawl-ah District Information & Public Relations Officer (DIPRO) Office a hawng.

I&PR Deputy Director Andrew H. Lalremruata kaihhruaia Khawzawl DIPRO Office hawnna hunah hian IPRP&S Minister B. Lalchhanzova chuan Information & Public Relations (I&PR) Department chu sawrkar hmalakna leh thuchhuah pawimawhte mipuite hriat tura puangzartu pawimawh tak a nih thu sawiin, I&PR a chak loh chuan ram kalphung tam tak a tha lo zawngin a nghawng theih thu a sawi a. Tunlai khawvelah thu dik lo leh belhchian dawl lo a thang chak tawh em em tih pawh sawiin, I&PR chu chutiang thu dik lo doleta thu dik tak leh rintlak chhuahtu pawimawh em em a ni a, hemi kawngah hian Mizoram Journalist Association (MJA) te nen tha taka an thawhho a ngai tih a sawi a. District hrang hranga DIPRO Office-te chu Staff leh hmanrua la nei tha tawk lo mah se rim taka theihtawp chhuaha thawk zel turin a chah bawk.

Khawzawl-a DIPRO Office hawnna hunah hian IPRP&S Secretary Betsy Zothanpari Sailo chuan inlawmna thu sawiin,  Khawzawl Bawrhsap K. Vanlalthiana pawhin thu a sawi bakah Khawzawl DIPRO Lalchungnungi Lakher chuan Khawzawl DIRPO Office chanchin a sawi a, I&PR Director K. Vanlalsangi’n lawmthu sawiin hun a khar a ni.

IPRP&S Minister B. Lalchhanzova hian niminpiah khan Champhai tlawhin nimin zing khan Champhai Press Club tlawhin MJA Member te nen an inkawm a, he hunah hian Minister chuan a Department enkawl-a hmalakna hrang hrangte tarlangin, MJA Member te pawhin an mamawh hrang hrangte an lo thlen bawk a. He hunah hian sum zawnna atana tunlaia a hman apiangin Youtube hmanga chanchin thar rintlak loh leh finfiahna awm mumal lo an thehdarh thin thu leh thlitfim pawh ni lem lova tihchhuah thin te hi tihtawp a nih theihna tura hmalak a tul thu te pawh an sawiho bawk a ni.