State Level Kayakalp Award hlanna hun hmang
Aizawl Khatla Bible House-a Bible Hall-a he hun hman ah hian Health Minister Lalrinpuii chuan Hospital leh Health Facility a thawktute inpekna leh thawhrimna avanga programme an hmang thei chu lawmawm a tih thu a sawi a. India ram pumah faina ngaih pawimawh niin, Swatch Bharat Campaign te pawh neih thin niin Kayakalp pawh hi Swatch Bharat initiative hnuaia mi a nih thu a sawi a. Kayakalp Scheme in a tum ber chu Cleanliness – Faina hi a nih thu sawiin, Mizoram chhunga damdawi In hrang hrangte, Sub-Centre atanga PHC, District Hospital thlengin an faiin an thianghlim hle tih sawiin, thawktute inpekna, thawhhona tha avanga lo hlawhtling thei a nih thu a sawi bawk.
Health Minister chuan, “Kayakalp kalpui a nihna chhan pakhat chu mipuite hian Indian Constitution hnuaiah Right to Health kan neih vang a ni,” tiin “Constitution chuan Right to Live hi mi zawng zawng fundamental right atan min pe a, Right to Live hnuaia pawimawh ber te zinga mi chu Right to Health a ni,” a ti a. Mipuite hian Hospital fai leh thianghlima inentir chu an dikna chanvo a nih thu lehchumi tur chuan thawktute hmalakna leh tanrualna a pawimawh tih thu a sawi bawk a. Faina kan kalpuina ah pawnlam faina chauh ngai pawihmawh lovin, Kayakalp-ah chuan natna darh tur venna lam- Infection prevention-te, damlote himna mai bakah quality healthcare-te kan ngaihpawimawh a tul thu a sawi bawk a. Kayakalp leh NQAS laimu ber chu hawihhawmna a nih thu pawh sawiin, “Ka chah duh ber chu damlo ten damdawi In an rawn panin hawihhawm leh rang taka lo buaipui zung zung tur leh enkawlna dik an mamawh ngei an dawn theihna tura hmalak hi a ni,” a ti bawk.
Kayakalp Award Scheme hi Ministry of Health and Family Welfare (MoHFW) bul tanna, Swachh Bharat Mission hnuaia hmalakna peng pakhat a ni a. Sawrkar damdawi In leh Clinic-ah faina, hriselna, bawlhhlawh sawngbawlna leh natna inkaichhawn laka himna kawnga hma la tha ber ber te chawimawina leh tan lak tharna tur atana buatsaih a ni a. Infrasturcture thianghlimna leh enkawl zui tlatna te; Hri laka invenna leh control-na hmanrua te; Damdawi in bawlhhlawh dik taka thiarfihlim te; Thawktute thiamna leh hna tlinna te; Damlo leh an chhungte lungawina leh Khawtlang inkungkaihna leh hmunhma tihfai nana hmalakna te chu tehfung-ah hman a ni a. District Hospital Award-ah Aizawl East District Hospital (CHA) in lawmman pakhatna dawngin Eco-Friendly District Hospital (DH)-ah Champhai District Hospital in lawmman pakhatna a dawng bawk.