Inthlan leh ah sawrkar chhunzawm beiseiawm ti

Power & Electricity Department changtu Minister F. Rodingliana chuan inthlan leh ah an sawrkar chhunzawm ngei a beiseiawm tih a sawi.

ZPM Party chuan nimin khan Aizawl-a an party Office-ah Chhung Inkhawm neiin he hunah hian P&E Minister F. Rodingliana chuan a Department enkawl a hmalakna te tarlangin, Mizoram pumah tunah hian kawlphetha pawttu, consumer 3,00,000 an awm thu leh Aizawl bikah 80,000 awmin Smart Meter 56,000 vuah a nih tawh thu a sawi a. “Electric a thim zing tia puhna te pawh hi kum 3 kalta kan enlet a, darkar tam fein ZPM sawrkar hnuah hian kan Eng tha zawk tih kan hmu a ni,” a ti a. “Kan policy a kan lo telh lawk; P&E Department chhungah Outgoing Feeder meter hi 398 turah 307 vuah a ni tawh. Darzo lui khuah tur chungchangah pawh hmalak zel niin company biak hmasak a rem loh avangin a ti thei tur Company dang biak mek niin; Chhim lam kan power mamawhna te pawh min chhawk chho thei dawn a ni,” a ti a. “Hydel Project leh Solar lamah pawh hma kan sawn chho zel a. Tuivai DPR kum 5 chhunga peih tura tih pawh thla 15 chhungin an rawn peih hman a. Mat Sekawi pawh Topographical surve zawh a ni tawh a. Report siam mek a ni,” a ti bawk.

Industry Department chungchang pawh Minister chuan sawiin, Bazarpui pawh a luhna tur kawngka pakhat chauh siam a nih vangin leh Emergency exit awm miah lova siam a lo nih vangin Zion Street lam leh Chhinga Veng lam atanga luh theih turin siam leh mek a nih thu a sawi a. “Industry ram, mi hausa leh thiltithei ten hnathawhna atan hmang si lova an neih mek hi Lengte-ah mi 68 leh Zuangtui-ah mi 80 vel chhuak tura lehkha pek an ni tawh,” tiin “Kan sawrkar hmalakna te hi sawrkar kalta ngaihtuah chuan kan thawk tha thawkhat hlein a lang a, inthlan lehah hian kan sawrkar chhunzawm ngei a beiseiawm hle a ni,” a ti a. “Kan awm danah hian mipuiin rorel zel tlaka min hmuh a ngai a, chuvang chuan Pathian hnenah tawngtai chungin ram rorelna ah Pathian ram thlentu kan nih theih nan; dik leh fel taka hnathawk zel turin party mite pawhin min venpui turin ka ngen che u ni,” a ti bawk.