International Day Against Drugs Abuse and Illicit Trafficking pualin YMA hruaitu ten Dan an zirho
Sub-Hqrs. YMA Hall, Serchhip-a he hun hman hi Excise & Narcotics Department-a Asst. Commissioner TC. Lalropuia chuan kaihruaiin Sub-Hqrs. YMA Serchhip President PC. Vanlalluna chuan he huna tel te inlawmna thu a sawi a, Excise & Narcotics Department ten YMA hruaitu ten Dan leh hrai an hriat theihna tura hetiang hun an buatsaih chu lawmawm a tih thu sawiin, YMA ten Kumpuan atana ‘Ruihhlo Do’ an neih angin Dan hnuaiah ruihhlo dona kawnga theihtawp chhuaha hmalak a tul thu leh khawtlang hruaitute leh sawrkar Department te nen tanho a tul thu a sawi a. He huna tel te chu Dan leh hrai hre lo zawka hrilh hretu ni turin a chah bawk a ni.
Kumin-a International Day against Drug Abuse & Illicit Trafficking-ah hian thupui atan ‘Persisting Issues, New Challenges, Innovative Responses’ tih hman a ni a, he thupui hmang hian Excise & Narcotics Department, Serchhip-a SI, B. Lalengmawia chuan thu sawiin, ruihhlo hluar zelah kan khua ah ngei pawh ruihhlo hmang an tam tak zel thu leh dan lova tawlhru pawh an pung zel nia a lan thu a sawi a. Hetianga ruihhlo leh a hmangsualtu an tam avang leh kan tu leh fa te pawh ruihhlo bawih-a tang ve thei an nih thu leh kan hmalam hun hriat theih a nih loh thu a sawi a. Hei vang hian ruihhlo dona kawnga theihtawp chhuaha tanrual a tul thu sawiin, ruihhlo zuar leh a tawlhtute hian hmanraw tha leh changkang zawk an hman zel avangin a dona kawnga thawktute pawh an inthuam thar ve zel a tul thu a sawi bawk.
Ruihhlo dona leh a man kawngah Dan zawng zawng zawm vek a harsat thu pawh SI, B. Lalengmawia chuan sawiin, amaherawh chu Dan hnuaiah a theih anga kan kal zel a tul thu a sawi a, ruihhlo avanga man te chu chu rei tak an tang lo a nih pawhin man an nih avang te, thubuai an neih avang leh Ukil rawih an mamawh avangte pawhin hremna an tuar tawh tih a sawi a, hei vang hian ruihhlo dona kawnga thawktute chu hnual mai tur leh beidawng mai tur an ni lo tih a sawi a. Ruihhlo dona ah khawtlang hruaitu, YMA leh tlawmngai pawl dangte tel lo chuan Excise & Narcotics Department chuan hna an thawk tak tak thei lo tih sawiin, an tanpuina ah mamawh thu leh thawhhona tha neih zel an duh thu a sawi bawk.
He hunaah hian kalkhawmte atangin Dan leh hrai leh ruihhlo dona kawnga hriat tur hrang hrang sawiho niin zawhna leh chhanna hun hman a ni bawk a, he hunah hian YMA hruaitu mi 70 vel an tel a ni.