HSS zirlaite tan Serchhip-ah Career Workshop neih a ni
Samagra Shiksha, Serchhip District; Institution’s Innovation Council; Govt. Zirtiri Residential Science College leh ZoCareer Solutions, Aizawl te tangho buatsaih he Programme hi nimin khan Govt. Higher Secondary School, Serchhip-ah neih niin Serchhip District Education Officer leh Samagra Shiksha-a District Project Coordinator, JR. Lalhruaitluanga chuan a kaihruai a. Workshop-ah hian Career thlan dan leh zirna kawng hrang hrang chungchang sawiho niin zirlaite hnenah an hmalam hun atana kaihhruina hrang hrangte tarlan a ni a, ‘Career Handbooks consisting of 500 Careers’ leh ‘My Career Advisor' App’ hmanga career hriatna zau zawk neih dan, zirna kawng hrang hrang thlan dan leh hna remchang hrang hrangte zirlaite hnenah hrilhfiah a ni bawk.
He Programme hi chawhma lamah Science Stream-a zirlaite tan neih niin Resource Person atan Dr. Lalhruaitluanga, Founder, ZoCareer Solutions & Assistant Professor & Chairman, Institution's Innovation Council, GZRSC chuan thupui hrang hrang sawiin, Science Subjet zirlai Class XI naupang 41 leh Class XII naupang 52, an vaiin zirlai 93 an tel a ni.
Chawhnu lamah Arts Stream zirlaite tan hun buatsaih chhunzawm leh niin Dr. Lalrinmawia, Associate Professor & Chairman, Information & Communication Technology, GZRSC chuan a kaihruai a, Arts Subject la zirlaite tan career remchang hrang hrang, Higher Education leh Digital Technology hmanga an hmalam hun atana ruahmanna siam dan turte an sawifiah a. He hunah hian Arts Subject la pawl 11 leh 12 zirlaite an tel ve leh bawk a, zirlaite atanga zawhna awm hrang hrangte pawh chhan a ni bawk.