Home Minister in Mualkhang Gas Bottling Plant a tlawh
Mualkhang-a Gas Bottling Plant a tlawhna ah hian Home Minister chuan eirawngbawlna gas hnianghnar zawk neihna tura Mualkhang Gas Bottling Plant tihchangtlun mek a ni chu lawmawm a tih thu sawiin, Gas Cylinder buk tling lo awm thin tihbo nana hmanraw tangkai a nih a beisei thu a sawi bawk. Home Minister lo dawngsawngtu Food, Civil Supplies & Consumer Affairs Minister B. Lalchhanzova chuan Aizawl khawpui leh Mamit chawm thei tur Piped Natural Gas kalpui turin ruahmanna a awm mek thu sawiin, ruahmanna tluang taka kalpui a nih chuan kum 2027 hian Sihhmui a thlen theih beisei a nih thu a sawi a. Mualkhang Gas Bottling Plant tihchangtlun hna thawh zawh a nih chuan nitin Gas cylinder 7500 bawr vel rawn thleng ziah tawh tura beisei a nih thu sawiin, hei hian eirawngbawlna Gas hnianghnar zawk mipuiin kan neih theihna tura hmalakna a nih thu a sawi bawk.
He hunah hian IOCL-a Deputy General Manager Z Lhungdim chuan Mualkhang Gas Bottling Plant-a hna an thawh dan tarlangin, Boundary hung leh Retaining Wall siam hna chu za zela 90 vel thawh zawh tawh a nih bakah Land Development hna pawh za zela 75 bawr zel thawh zawh a nih thu a sawi a. Heng hnate hi July ni 21, 2026 hian thawh zawh hman beisei a nih thu a sawi a. Heng hna thawh zawh a nih hnu hian Mounted Storage Vessel bun hna thawh tan tur a ni dawn tih sawiin, ruahman dan chuan 900 MT dawl zo tur leh nitin LPG cylinder 7500 bawr vel a dawng zo dawn tih a sawi a. Kangmei chhuak palh a kang thelhna tur Tui KL 6000 dawng thei tur Tanky sak a ni dawn bakah, thawktu, Contract Staff mi 50 bawr vel mamawh a nih tur thu a sawi bawk.